ახალციხის ციხეში შეკრებილ მოსახლეობას საქართველოს პრეზიდენტმა მიმართა

მან საუბარი ოლიმპიადის თემით დაიწყო. ოლიმპიურ ჩემპიონსა და ვერცხლის მედალოსანს მიესალმა და აღნიშნა, რომ საქართველომ აიღო უფრო მეტი მედალი ვიდრე ინდოეთმა და ბელგიამ, რომელიც ძალიან მდიდარი ქვეყანაა.

ახალციხის ციხეს საქართველოს პრეზიდენტმა აღმშენებლობის გვირგვინი უწოდა.

- ”ჩვენ აღმშენებლობა სიღნაღში ვისწავლეთ. შეიძლება შეცდომები დავუშვით, მაგრამ ვისწავლეთ და საბოლოო ჯამში ჩვენ ავაშენეთ რაბათი, რომელიც არის გვირგვინი აღმშენებლობის”, - განაცხადა პრეზიდენტმა.

მან შოთა რუსთაველის სიტყვები მოიშველია და განაცხადა, რომ "შეიძლება ეს იყო ის ციხე, სადაც იჯდა მეფე როსტევანი, მაგრამ ამ ციხეში ნამდვილად არ იქნებოდა დატყვევებული ნესტან-დარეჯანი".

- ”ეს არის უნიკალური ადგილი საქართველოსთვის, ეს არის აღმშენებლობის სიმბოლო. აქ აღდგა მე-9 საუკუნის ეკლესაიც, სადაც დღეს პირველი წირვა-ლოცვა გაიმართა”, - განაცხადა პრეზიდენტმა და შემდეგ დაგეგმილ მშენებლობებზე, სვანეთში, თუშეთში, კახეთში და გორში აღსადგენ ობიექტებზე ისაუბრა.

აქვე პრეზიდენტმა განაცხადა, რომ მალე დაიწყება ახალი ქალაქის ლაზიკას მშენებლობაც: ”საქართველოში შენდება ახალი ქალაქები. ბათუმი არის ახალი ქალაქი, თელავი სტიქიის შემდეგ ასევე ახალი ქალაქი იქნება. ახალციხე არის არამხოლოდ ახალი ციხე, არამედ ახალი ქალაქი. აქ წელიწადში 100 ადამიანი თუ ამოდიოდა, ახლა 100 000 ადამიანი მოვა და ფულს დატოპვებს ადგილობრივების კაფეებში და რესტორნებში”.

პრეზიდენტის განცხადებით, ახალციხის ციხის აღდგენა საქართველოს პრემიერ-მინისტრის ივანე მერაბიშვილის ინიციატივა იყო, რომელიც წარმოშობით მესხეთიდანაა. პრემიერ-მინისტრს პრეზიდენტმა გორის ციხის აღდგენის დავალება მისცა.

- ”ჩემი ბაბუა მიხეილ სააკაშვილი წარმოშობით გორიდანაა და ასეთივე ციხე მინდა გორში”, - განაცხადა პრეზიდენტმა.

გამოსვლისას პრეზიდენტმა კიდევ ერთი იდეა გაახმოვანა.

”ლაზიკაში ბანას მსგავსი ტაძარი უნდა აშენდეს”, - მიმართა მან ახალციხის, ტაო-კლარჯეთისა და ლაზეთის მთავარეპისკოპოსს მეუფე თეოდორეს.

[sknews.ge]