ახალციხეში ვანო მერაბიშვილის სახლს დილიდან პოლიცია აკონტროლებს

პოლიციის თანამშრომლები აკონტროლებენ ახალციხის ცენტრალური ქუჩის, რუსთაველის ქუჩის იმ ნაწილსაც, რომელიც მერაბიშვილის სახლს ესაზღვრება.

ქალაქში გავრცელებულია ინფორმაცია, რომ ვანო მერაბიშვილის ოჯახი საქართველოს პრეზიდენტმა მიხეილ სააკაშვილმა უნდა მოინახულოს. ასახელებენ მისი ვიზიტის დროსაც. სავარაუდოდ, მიხეილ სააკაშვილი მერაბიშვილებს ერთ საათში ესტუმრება. პრეზიდენტის არაოფიციალური ვიზიტის შესახებ ავრცელებს ინფორმაციას ადგილობრივი ტელეკომპანია „მე-9 არხიც“. ტელეკომპანიაში ამბობენ, რომ ინფორმაცია მათ იმ სამართალდამცველებისგან გაიგეს, რომლებიც ტერიტორიას იცავენ.

„სამხრეთის კარიბჭემ“ ინფორმაცია რამდენიმე წყაროსთან გადაამოწმა. პრეზიდენტის პრესსამსახურში მისი ვიზიტის შესახებ ინფორმაცია არ დაგვიდასტურეს. მიხეილ სააკაშვილის სტუმრობის შესახებ ინფორმაციას არც მასპინძლები ფლობენ.

„სტუმრად ვარ, არაფერი ვიცი, რომ მოდიოდეს ალბათ გაგვაფრთხილებდნენ“, - გვითხრა ვანო მერაბიშვილის დედამ ჟენია მერაბიშვილმა.

პრეზიდენტის მოსალოდნელი ვიზიტის შესახებ არც „ნაციონალური მოძრაობის“ შტაბშტი აქვთ ინფორმაცია.

„არაფერი ვიცი“, - გვითხრა „ნაციონალური მოძრაობის“ ახალციხის შტაბის უფროსმა მალხაზ გიქოშვილმა.

სამართალდამცველები მერაბიშვილის სახლთან ამ წუთებშიც იმყოფებიან. „სამხრეთის კარიბჭემ“ რამდენიმე ფოტოს გადაღება მოახერხა. თუმცა, ოდნავ მოგვიანებით, სამართალდამცველებმა გვითხრეს, რომ მათი ნებართვის გარეშე ფოტო/ვიდეო გადაღებისა და რაიმე ინფორმაციის გავრცელების უფლება არ გვაქვს.

მერაბიშვილის სახლთან რჩება „სამხრეთის კარიბჭეც“.



[Sknews.ge]