ახალციხეში საკონსტიტუციო ცვლილებები მქუხარე ტაშის ფონზე განიხილეს

ახალციხეში მესხეთის სახელმწიფო დრამატული თეატრის 500–კაციანი დარბაზი 12 საათისთვის სავსე იყო. რეგიონის ყველა მუნიციპალიტეტიდან ადმინისტრაციული სამსახურების, ააიპ–ების, საბავშვო ბაღებისა და სკოლების, ასევე სამცხე–ჯავახეთის სამხარეო ადმინსიტრაციის თანამშრომლები საკონსტიტუციო ცვლილებების საყოველთა–საჯარო განხილვისთვის შეიკრიბნენ.

ვიდრე სხდომა დაიწყებოდა, პარლამენტის საპროცედურო საკითხთა კომიტეტის თავმჯდომარემ გიორგი კახიანმა განაცხადა, რომ მოსახლეობისთვის საკონსტიტუციო ცვლილებების განხილვის განრიგი წინასწარ ცნობილი იყო და მოსახლეობის მასშტაბური მობილიზებაც ამით ახსნა.

„ყველა ინფორმირებულია“, – განაცხადა მან.

„სამხრეთის კარიბჭეს“ შეკითხვაზე, თუ რა ფორმით მოხდა ხალხის ინფორმირება და იყვნენ თუ არა ამ პროცესში ჩართული თვითმმართველობები, კახიანმა გვიპასუხა: „პარლამენტის ვებ–გვერდზეა გამოქვეყნებული ეს ინფორმაცია“.

პარლამენტის ვებ–გვერდზე განთავსებული განრიგი, როგორც დარბაზში წარმოდგენილი დამსწრეების მიხედვით ჩანდა, ძირითადად მხოლოდ საბიუჯეტო ორგანიზაციების წარმომადგენლებისთვის იყო ცნობილი. დარბაზში, რომ უმრავლესობა „ქართული ოცნების“ მხარდამჭერი იყო ეს უმრავლესობის ყველა წარმომადგენლის გამოსვლის, ან რეპლიკის შემდეგ მქუხარე ტაშით გამოიხატებოდა.



ამის შესახებ დარბაზში ერთ–ერთმა გამომსვლელმა „დემოკრატიული მოძრაობის“ წარმომადგენელმა მამუკა არჩბამაც განაცხადა: „დარბაზი უნდა იყოს სავსე ხალხით და არა ადმინისტრაციული რესურსით“.

არჩბას განცხადებას დარბაზში ხმაური მოჰყვა. შეხვედრის დასრულების შემდეგ კი მას საჯარო მოხელეები არ დაეთანხმნენ.

„არ ვფიქრობ, რომ საჯარო მოხელეებით იყო სავსე დარბაზი. ბორჯომში მთელ მუნიციპალიტეტში ერთი დღით, საშუალოდ, 20 კაცის გათავისუფლება მომიხდა. ეს კი მთელი დამსწრე საზოგადოების 15 პროცენტსაც არ შეადგენდა. არავისთვის არაფერი დაგვიძალებია, ყველა თავისი „ხოდით ჩამოვიდა“, – გვითხრა ბორჯომის მუნიციპალიტეტის გამგებელმა დიმიტრი ყიფიანმა.

თუმცა, ბორჯომიდან „თავისი ხოდით“ პირველი საჯარო სკოლის მასწავლებლები არ ჩამოსულან. ათობით პედაგოგი სპეციალურად დაქირავებულმა ავტობუსმა ჩამოიყვანა.

„აქ ყველა პედაგოგები ვართ. დეტალურად იქნა განხილული დღეს საკონსტიტუციო ცვლილებები. რამდენად გაამართლებს ეს ცვლილებები დრო გვიჩვენებს“, – გვითხრა ბორჯომის პირველი სკოლის პედაგოგმა მედეა გოგოლაძემ.



მიკროავტობუსებით იყვნენ ჩამოსულები სხვა მუნიციპალიტეტებიდანაც.

„ყველა ცვლილება რაც გაჟღერდა მისაღებია“, – განაცხადა ადიგენში, სოფელ ლელოვნის საჯარო ბაღის მენეჯერმა მანანა რეხვიაშვილმა.

რაც შეეხება ადიგენის მუნიციპალიტეტის გამგეობის თანამშრომლებს ისარგებლეს თუ არა მათ ერთდღიანი შვებულებებით უცნობია. ადიგენის მუნიციპალიტეტის გამგებელი ზაქარია ენდელაძე ამბობს, რომ ამის შესახებ მას ინფორმაცია არ აქვს: „აქ დილით პირდაპირ სახლიდან მოვედი“.

მისივე თქმით, თანამშრომლის შვებულებაში გაშვებაზე ხელს განცხადებას გამგებელი, ან მისი მოვალეობის შემსრულებელი აწერს. შეკითხვაზე, არის თუ არა ამჟამად თავად გამგებელი, ან ასრულებს თუ არა სხვა მის მოვალეობას გვპასუხობს: „ახლა შეხვედრაზე მივდივარ, მომასვენეთ“.

ადიგენის გამგებლისგან გასხვავებით, ახალციხის მუნიციპალიტეტის გამგებელი ზაზა მელიქიძე ამბობს, რომ დღევადელ დღეს, თანამშრომლების ერთი დღით სამსახურიდან გათავისუფლება ნამდვილად მოუხდა: „გვევალებოდა, რომ ინფორმაცია მიგვეწოდებინა მოსახლეობისთვის. რაც შეეხება ჩვენ თანამშრომლებს, ვისაც სურვილი ჰქონდა დასწრების მოგვმართა განცხადებით, რომ გაგვეთავისუფლებინა და დავაკმაყოფილეთ. ასეთი განცხადება 15–ს არ აღემატება“.

დაახლოებით, 20 თანამშრომლის ერთი დღით გათავისუფლება მოუხდა ახალციხის მერს ვლადიმერ ზედგინიძეს.

„წამომყევით და გაჩვენებთ ყველა ბრძანებას. ყველა თანამშრომელი ვინც დღეს დარბაზში იყო, ერთი დღით გათავისუფლებული მყავს. კონსტიტუცია ეს ჩვენი ძირითადი ნორმაა და ამიტომ ვფიქრობ, საჯარო მოხელეები მის განხილვას უნდა ესწრებოდნენ“, – აცხადებს ზედგინიძე.

დარბაზში წარმოდგენილი დამსწრეების სიმრავლით შეხვედრის დასრულების შემდეგ კმაყოფილება გამოხატა პარლამენტის თავმჯდომარემ ირაკლი კობახიძემ: „ძალიან ფართო სპექტრია წარმოდგენილი საზოგადოების სეგმენტის. ასეთი მასშტაბური განხილვა საკონსტიტუციო ცვლილებების არასდროს გამართულა“.

შეკითხვაზე, შემთხვევით იყო ის, რომ დარბაზში შეკრებილების უმრავლესობა საკონსტიტუციო ცვლილებებს მხარს უჭერდა, თუ ეს იმიტომაა ასე, რომ შეხვედრის ორგანიზება „ქართულმა ოცნებამ“ უზრუნვეყლო, კობახიძემ გვიპასუხა: „ყველა დარბაზში ჰქონდა ოპოზიციას იმის საშუალება, რომ სათანადოდ ყოფილიყო წარმოდგენილი. მათ შორის ოპოზიციურ პარტიებს“.

საკონსტიტუციო ცვლილებების განხილვა ახალციხეში დაახლოებით სამი საათის განმავლობაში მიმდინარეობდა. ეს პროცესი 15 მაისს თბილისში დასრულდება.



[თამუნა უჩიძე, ახალციხე]