'ხელი აწიეთ, რამდენი გაეცანით საკონსტიტუცუციო ცვლილებების პროექტს' – ხმაური განხილვაზე

მას შემდეგ, რაც ახალციხეში, საკონსტიტუციო ცვლილებების საყოველთაო სახალხო განხილვაზე, პრეზენტაციის ნაწილი დასრულდა და კითხვა–პასუხის რეჟიმი დაიწყო, მიკროფონთან "დემოკრატიული მოძრაობის" წარმომადგენელი მამუკა აჩბა მივიდა და დარბაზს მიმართა: "ხელი აწიეთ დარბაზში, რომელს გაქვთ წაკითხული საკონსტიტუციო ცვლილებების პროექტი".

500–კაციან დარბაზში, რომელიც სავსეა, ხელი სულ რამდენიმე ადამიანმა ასწია.

ამის შემდეგ მამუკა აჩბამ ირაკლი კობახიძეს მიმართა: "თქვენ ვერ უზრუნველყავით, რომ პროექტი მიგეწოდებინათ ახალციხელებისთვის. როცა გამოხვედით და პრეზენტაცია დაიწყეთ, გაგიხარდათ, რომ დარბაზი სავსეა ხალხით. ეს ასეც უნდა იყოს, მეც მივესალმები. მაგრამ, დარბაზი უნდა იყოს სავსე ხალხით და არა ადმინისტრაციული რესურსით".

კითხვა–პასუხის ნაწილში, ირაკლი კობახიძე კითხვებს მაშინვე არ პასუხობს, მას შემდეგ, რაც ყველა კითხვას მოისმენს, თუმცა, ამჯერად, მან აჩბას უპასუხა: "პროვოკაციული კითხვებით გამოირჩევით. სხვა შეხვედრებზეც დადიხართ და იიგივეს ცდილობთ. თქვენ ამით შეურაცხყოფას აყენებთ საზოგადოებას".

ამ დიალოგის შემდეგ კითხვები სხვებმა დასვეს. აჩბა იცდიდა პასუხის დასაბრუნებლად, თუმცა, მას საშუალება არ მიეცა, მიკროფონი არ ჩაურთეს, ამიტომ, მან ირაკლი კობახიძეს ხმამაღლა მიმართა და უთხრა, რომ მათ ხალხი შეცდომაში შეჰყავთ და ის არ არის პროვოკატორი. უპასუხა, რომ იცდიდა, პასუხის გასაცემად, თუმცა, რადგან საშუალება არ მიეცა, ასე ამიტომ მოიქცა.

აჩბას ამ მიმართვას, დარბაზში ხმაური მოჰყვა. მას შეხვედრა დაატოვებინეს.

შეგახსენებთ, დღეს, 10 მაისს, ახალციხეში, მესხეთის თეატრის დარბაზში, საკონსტიტუციო ცვლილებების საყოველთაო სახლახო განხილვა იმართება.

[sknews.ge]