ახალციხეში საკონსტიტუციო ცვლილებები განიხილეს

საკონსტიტუციო ცვლილებები ადგილობრივ მოსახლეობას საქართველოს პარლამენტის წევრებმა, ზურაბ აბაშიძემ, თამარ კორძაიამ, გიორგი კახიანმა და ახალგაზრდა იურისტთა ასოციაციის იურისტმა გიორგი გოცირიძემ გააცნეს. შეხვედრას ათამდე ადამიანი ესწრებოდა, მათ შორის, არ იყვნენ „ნაციონალური მოძრაობის“ წარმომადგენლები.

საქართველოს პარლამენტმა საკონსტიტუციო ცვლილებების სამი პროექტი მოამზადა.

საკონსტიტუციო ცვლილებების ერთ-ერთი პროექტი ეხება საქართველოს იმ მოქალაქის მიერ საქართველოს პრეზიდენტის, საქართველოს პრემიერ-მინისტრის ან საქართველოს პარლამენტის თავჯდომარის თანამდებობის დაკავების საკითხს, რომელიც იმავდროულად უცხო ქვეყნის მოქალაქეა.

აღნიშნულ საკითხს საქართველოს პარლამენტის წევრი თამარ კორძაია დისკრიმინაციულს უწოდებს: „მაგალითად, თუ თავდაცვის მინისტრს ან პარლამენტის წევრებს შეუძლიათ იყოს ორმაგი მოქალაქე, რატომ არ შეუძლია პრემიერ-მინისტრს ან პარლამენტის თავჯდომარეს ქონდეს ორმაგი მოქალაქეობა?!“

„დისკრიმინაციის აღმოფხვრის კუთხით ეს არის სასიცოცხლო გადაწყვეტილება“, - აცხადებს პარლამენტის თავჯდომარის მოადგილე ზურაბ აბაშიძე.

მეორე ცვლილება, საქართველოს მთავრობის მიერ ინიცირებულ კანონპროექტებთან დაკავშირებით, საქართველოს პარლამენტის წინაშე მთავრობის ნდობის საკითხის დასმას უკავშირდება.

„რაღაც საკითხები სრულიად დაუბალანსებელია და ჩვენ ვფიქრობთ, რომ ზუსტად ამ საკითხებში უნდა შევიდეს ცვლილებები. უნდა განისაზღვროს მთავრობის და პარლამენტის უფლებამოსილება“, - ამბობს ზურაბ აბაშიძე.

მესამე საკითხი კი საქართველოს კონსტიტუციის გადასინჯვის კანონპროექტსა და კონსტიტუციური კანონის პროექტზე პრეზიდენტის ვეტოს დაძლევისათვის საჭირო კვორუმის საკითხებს ეხება.

„დღეს არსებული ნორმით, პარლამენტის სრულ შემადგენლობის ორ მესამედს შეუძლია შეცვალოს კონსტიტუცია და მინდა გითხრათ, რომ ეს 2/3 უმრავლესობას არ აქვს, წინა მოწვევის პარლამენიტისაგნ განსხვავებით“, - ამბობს კორძაია.

საყოველთაო-სახალხო განხილვები უკვე ჩატარდა თბილისში, ქუთაისში, ბათუმში, რუსთავსა და თელავში.

[მანანა სარაშვილი, ახალციხე]