ბათუმი–ახალციხის გზის რეაბილიტაციაზე დასაქმებულები პროტესტს წყვეტენ

სამშენებლო კომპანია „ჩელიაბინსკტრანსსიგნალის“ ხელმძღვანელობა და საავტომობილო გზების დეპარტამენტის წარმომადგენლები დღეს, 5 მაისს, ბათუმი–ახალციხის გზის რეაბილიტაციაზე დასაქმებულ მხოლოდ რამდენიმე მუშას შეხვდნენ.

შეხვედრა თავდაპირველად სოფელ ფარეხას მიმდებარე ტერიტორიაზე უნდა გამართულიყო, იქ სადაც პროტესტის ნიშნად მუშები იყვნენ შეკრებილი. თუმცა, კომპანიის წარმომადგენლებმა ჟურნალისტების თანდასწრებით შეხვედრაზე უარი თქვეს. ადგილზე შეკრებილმა მუშებმა კი ტერიტორიის დატოვება მოგვთხოვეს.

„იციან, რომ აქ ხართ. ახლა დამირეკეს და მითხრეს, რომ არ მოვლენ, ვიდრე თქვენ არ წახვალთ“, –გვითხრა ერთ–ერთმა მუშამ.
მოგვიანებით, საავტომობილო გზების დეპარტამენტისა და კომპანიის წარმომადგენლები გაფიცული მუშების ნაწილს ჟურნალისტების გარეშე შეხვდნენ.

მოლაპარაკებების შედეგად მხარეები შეთანხმდნენ, რომ მუშები მშენებლობას განაახლებენ, კომპანია კი დავალიანებას 17 მაისს დაფარავს.

„გვითხრეს, რომ დოკუმენტებში ხარვეზები ჰქონდათ და აქამდე ვერ გვირიცხავდნენ. დაგვპირდნენ, რომ 17 მაისს აუცილებლად ჩაგვირიცხავენ. დაველოდებით, თუ დანაპირებს არ შეასრულებენ, ისევ შევაჩერებთ, სამუშაოებს“, – ამბობს ერთ–ერთი დასაქმებული თემურ ინასარიძე.

სამშენებლო კომპანია „ჩელიაბინსკტრანსსიგნალის“ წარმომადგენელმა გიორგი წერეთელმა, რომელიც ჩვენს ზარებს ორი დღის განმავლობაში არ პასუხობდა, დღეს განაცხადა, რომ პრობლემა მოგვარდა. კითხვაზე, რატომ არ ურიცხავდა კომპანია მუშებს კუთვნილ ხელფასს, – წერეთელმა არ გვიპასუხა: „დავპირდით და დათქმულ დროს ისინი კუთვნილ ხელფასებს მიიღებენ. სხვა დეტალებზე ჩვენ მათ უკვე ვესაუბრეთ და სამუშაოებსაც გააგრძელებენ“.



შეგახსენებთ, ბათუმი–ახალციხის საავტომობილო გზის 8,5 კმ–იანი მონაკვეთის რეაბილიტაციაზე დასაქმებულმა მუშებმა, პროტესტის ნიშნად სამუშაოები სამი დღის წინ, 3 მაისს შეაჩერეს. დასაქმებულები ბოლო სამი თვის ხელფასებს ითხოვენ. მუშები ორი დღის განმავლობაში ითოვდნენ კომპანიის წარმომადგენლებთან შეხვედრას, თუმცა, ეს შეხვედრა მხოლოდ დღეს შედგა.

გუშინ, 5 მაისს, გვიან საღამოს, საავტომობილო გზების დეპარტამენტმა განცხადება გაავრცელა, რომელშიც ნათქვამია, რომ ბათუმი–ახალციხის გზის მშენებლობაზე დასაქმებულებს სახელფასო დავალიანებას კომპანია „ჩელიაბინსკტრანსსიგნალი“ მომავალი კვირის ბოლომდე აუნაზღაურებს: „კომპანიისგან ამის პირობა საავტომობილო გზების დეპარტამენტმა მიიღო. პროცესი მუდმივი მონიტორინგის ქვეშაა და პრობლემას კონტრაქტორი კომპანია უახლოეს დღეებში გადაჭრის“.

.



[ლუბა გიორგაძე, ახალციხე]