ამ წუთებში ისინი სოფელ ფარეხასთან იკრიბებიან და კომპანიის ხელმძღვანელობასა და საგზაო დეპარტამენტის წარმომადგენლებს ელოდებიან.
შეგახსენებთ, ბათუმი–ახალციხის საავტომობილო გზის 8,5 კმ–იანი მონაკვეთის რეაბილიტაციაზე დასაქმებულმა მუშებმა, პროტესტის ნიშნად სამუშაოები სამი დღის წინ, 3 მაისს შეაჩერეს. დასაქმებულები ბოლო სამი თვის ხელფასებს ითხოვენ.
„რვა თვეა გზის სამუშაოები მიმდინარეობს და ხელფასებს თითქმის ყოველ თვეში გვიგვიანებდნენ, ბოლო სამი თვის ნამუშევარი საერთოდ არ აგვიღია. თითოს 9 000 ლარამდე გვაქვს ასაღები“, – ამბობს ერთ–ერთი დასაქმებული თემურ ინასარიძე, რომელიც მშენებლობაზე სატვირთო მანქანით მუშაობს.
3 მაისს ერთად შეკრებილი მუშები კომპანიის ხელმძღვანელობასთან შეხვედრას ითხოვდა, თუმცა, მათთან არავინ მივიდა.
ბათუმი–ახალციხის საავტომობილო გზის 8,5 კმ–იანი მონაკვეთის რეაბილიტაციაზე საავტომობილო გზების დეპატრამენტმა ტენდერი 2016 წლის 16 იანვარს, 8.752.530 ლარზე გამოაცხადა. ტენდერში ორი კომპანია მონაწილოებდა. გამარჯვებული შპს სამშენებლო-სამონტაჟო საექსპლუატაციო საწარმო "ჩელიაბინსკტრანსსიგნალის” საქართველოს ფილიალი გახდა. 8.5 კმ–იან მონაკვეთზე შესასრულებელი სამუშაოების ღირებულება 8 მილიონ 500 ათასი ლარით განისაზღვრა.
ორი დღის განმავლობაში, კომპანიის წარმომადგენლებს ვერც "სამხრეთის კარიბჭე" დაუკავშირდა. ხელმძღვანელობაში ჯერ არ პასუხობდნენ, შემდეგ კი გათიშეს ყველა ის ნომერი, რომელიც მოვიპოვეთ. საქართველოს საავტომობილო გზების დეპარტამენტში კი განაცხადეს, რომ ტენდერში გამარჯვებულ კომპანიას ყველა ხარჯისათვის თანხა უკვე ჩარიცხული აქვს და მუშებთან პრობლემა მათ უნდა მოაგვარონ.
გუშინ, 5 მაისს, გვიან საღამოს, საავტომობილო გზების დეპარტამენტმა განცხადება გაავრცელა, რომელშიც ნათქვამია, რომ ბათუმი–ახალციხის გზის მშენებლობაზე დასაქმებულებს სახელფასო დავალიანებას კომპანია „ჩელიაბინსკტრანსსიგნალი“ მომავალი კვირის ბოლომდე აუნაზღაურებს.
„კომპანიისგან ამის პირობა საავტომობილო გზების დეპარტამენტმა მიიღო. პროცესი მუდმივი მონიტორინგის ქვეშაა და პრობლემას კონტრაქტორი კომპანია უახლოეს დღეებში გადაჭრის“, - ნათქვამია საავტომობილო გზების დეპარტამენტში.
შეგახსენებთ, ბათუმი–ახალციხის მაგისტრალის შეკეთებაზე საუბარი გასული, 2016 წლის გაზაფხულზე დაიწყო. ბათუმისა და ახალციხის დამაკავშირებელი ორი საავტომობილო გზა არსებობს. ბათუმიდან ხაშურის გავლით, ახალციხემდე დაახლოებით 320 კილომეტრია, რომლის დაფარვას ავტომობილით 6 საათი სჭირდება. ორჯერ მცირეა მანძილია ბათუმიდან ახალციხემდე გოდერძის უღელტეხილის გავლით. რეაბილიტაცია სწორედ ამ გზას უტარდება, თუმცა, არა მთლიან მონაკვეთს. Google.ge/map-ის მიხედვით, ახალციხე–ბათუმის საავტომობილო გზის მთლიანი სიგრძე 161 კილომეტრია, სატენდერო დოკუმენტაციის თანახმად, შეკეთდა გზის მონაკვეთი 150კმ-დან და 159კმ-ზე. ფაქტობრივად, საუბარია ეგრეთ წოდებულ, ფარეხის გზაზე, რომელიც იწყება ახალციხის გასასვლელიდან, რკინიგზის გადასასვლელიდან და მოიცავს მცირე მონაკვეთს ადიგენის ტერიტორიაზე.
ახალციხე–ბათუმის საავტომობილო გზის 8.5 კმ–იანი მონაკვეთის მშენებლობის დასრულებამდე ერთი კილომეტრის რეაბილიტაციაა დარჩენილი. მუშები ამბობენ, რომ სამუშაოებს იქამდე არ გააგრძელებენ, ვიდრე კომპანია სახელფასო დავალიანებას არ დაფარავს.
[ლუბა გიორგაძე, ნინო ნარიმანიშვილი, ახალციხე]
FM97.5 / LIVE
