ბათუმი–ახალციხის გზაზე დასაქმებული მუშები დღეს ორი საათით გაიფიცნენ

ბათუმი–ახალციხის საავტომობილო გზის მშენებლობაზე დასაქმებულმა 15–მდე მუშამ დილა პროტესტით დაიწყო. ისინი სამუშაოების გაგრძელებას იქამდე არ აპირებდნენ, ვიდრე დამსაქმებელი კომპანია „ჩელიაბინსკ ტრანსსიგნალი“ დარჩენილ სახელფასო დავალიანებას სრულად არ აუნაზღაურებდა.

თუმცა, კომპანიის ხელმძღვანელობის მორიგი დაპირების შემდეგ, რომ 18 ივნისამდე მათ დავალიანება სრულად დაერიცხებათ, დასაქმებულებმა პოზიცია 2 საათში შეიცვალეს და სამუშაოებს დაუბრუნდნენ.

„რამდენ ხანს შეიძლება ვითმინოთ დაპირებები, ბავშვები ხომარ ვართ, დილით ორ საათზე მეტ ხანს გაჩერებულები ვიყავით, ვფიქრობდით ვიდრე ხელფასებს არ ჩაგვირიცხავენ, არ გვემუშავა მაგრამ, დაგვირეკა ხელმძღვანელობამ და გვითხრა, რომ ისევ გაგვეგრძელებინა სამუშაო“–გვეუბნება ერთ–ერთი დასაქმებული ოლეგ ჩილინგარაშვილი.

რაც შეეხება იმ მუშებს, რომლებიც ბათუმი–ახალციხის საავტომობილო გზის მშენებლობაზე სამუშაოდ ხაშურიდან და სურამიდან ჩამოვიდნენ, დამსაქმებელმა კომპანიამ დავალიანების 50 პროცენტი გუშინ, 12 ივნისს აუნაზღაურა.

ერთ თვიანი პროტესტის მიუხედავად, მუშების ნაწილისგან განსხვავებით, მათ 12 ივნისამდე ხელფასები საერთოდ არ ჰქონდათ მიღებული.

„ნახევარი ჩაგვირიცხეს, ნახევარზე დაგვპირდნენ რომ თვის ბოლოს იქნება და ველოდებით, იმდეია ჩაგვირიცხავენ“, – ამბობს სურამის მკვიდრი გიორგი ლაბაძე.

შეგახსნებთ, რომ სამ თვიანი სახელფასო დავალიანების გამო 60–მდე მუშა პროტესტის ნიშნად მიმდინარე წლის 3 მაისს გაიფიცა. მუშებმა გზაზე, ჯერ საპროტესტო აქცია გამართეს, შემდეგ კი სამუშაო პროცესი შეაჩრეს და ვიდრე კომპანია დავალიანებას არ აუნაზღაურებდა, სამუშაოების გაგრძელებას არ აპირებდნენ. დასაქმებული მუშების უმეტესობას ხელფასები 17 მაისს დაერიცხა, ნაწილმა კი დავალიანების ერთიმესამედი ორი კვირის წინ მიიღო.

ბათუმი–ახალციხის საავტომობილო გზის 8,5 კმ–იანი მონაკვეთის რეაბილიტაციაზე საავტომობილო გზების დეპატრამენტმა ტენდერი 2016 წლის 16 იანვარს, 8.752.530 ლარზე გამოაცხადა. ტენდერში ორი კომპანია მონაწილოებდა. გამარჯვებული შპს სამშენებლო-სამონტაჟო საექსპლუატაციო საწარმო "ჩელიაბინსკტრანსსიგნალის” საქართველოს ფილიალი გახდა. 8.5 კმ–იან მონაკვეთზე შესასრულებელი სამუშაოების ღირებულება 8 მილიონ 500 ათასი ლარით განისაზღვრა. სამუშაოები გასული წლის გაზაფხულზე დაიწყო. მშენებლობა სავარაუდოდ ორ კვირაში დასრულდება.

[ლუბა გიორგაძე–ახალციხე]