ბათუმი–ახალციხის გზაზე დასაქმებულები: „ხვალიდან გავიფიცებით“

ბათუმი–ახალციხის საავტომობილო გზაზე დასაქმებულებს, დამსაქმებელი კომპანია „ჩელიაბინსკტრანსსიგნალი“ სახელფასო დავალიანების ანაზღაურებას 18 ივნისამდე დაპირდა, თუმცა მუშების თქმით, მათ ანგარიშებზე ხელფასი ჯერ კიდევ არ დარიცხულა.

„ხუთი დღის წინ გვქონდა საუბარი, რომ ჩაგვირიცხავდნენ და დღემდე ველოდებით, თუ არ ჩაგვირიცხავენ, ხვალიდან გავიფიცებით, უკვე გადაწყვეტილი გვაქვს“–გვეუბნება ერთ–ერთი დასქმებული ოლეგ ჩილინგარიშვილი.

მისივე თქმით, გზის მონაკვეთზე სამუშაოები თითქმის დასრულებულია, მოეწყო ჯებირები და გზა მოიხრეშა , ახლა კი მხოლოდ მოასფალტებაა დარჩენილი: „ხელფასს თუ არ მივიღებთ სრულად, მუშაობას აღარ გავაგრძელებთ“.

შეგახსნებთ, რომ სამთვიანი სახელფასო დავალიანების გამო 60–მდე მუშა პროტესტის ნიშნად მიმდინარე წლის 3 მაისს გაიფიცა. მუშებმა გზაზე, ჯერ საპროტესტო აქცია გამართეს, შემდეგ კი სამუშაო პროცესი შეაჩრეს და ვიდრე კომპანია დავალიანებას არ აუნაზღაურებდა, სამუშაოების გაგრძელებას არ აპირებდნენ. დასაქმებული მუშების უმეტესობას ხელფასები 17 მაისს დაერიცხა, ნაწილმა კი დავალიანების ერთიმესამედი ორი კვირის წინ მიიღო.

ბათუმი–ახალციხის საავტომობილო გზის 8,5 კმ–იანი მონაკვეთის რეაბილიტაციაზე საავტომობილო გზების დეპატრამენტმა ტენდერი 2016 წლის 16 იანვარს, 8.752.530 ლარზე გამოაცხადა. ტენდერში ორი კომპანია მონაწილოებდა. გამარჯვებული შპს სამშენებლო-სამონტაჟო საექსპლუატაციო საწარმო "ჩელიაბინსკტრანსსიგნალის” საქართველოს ფილიალი გახდა. 8.5 კმ–იან მონაკვეთზე შესასრულებელი სამუშაოების ღირებულება 8 მილიონ 500 ათასი ლარით განისაზღვრა. სამუშაოები გასული წლის გაზაფხულზე დაიწყო. მშენებლობა სავარაუდოდ ორ კვირაში დასრულდება.

[ლუბა გიორგაძე–ახალციხე]