ბათუმი-ახალციხის გზაზე დასაქმებულები კომპანიის ხელმძღვანელებს ხვდებიან

შეხვედრა თბილისში იმართება. როგორც „სამხრეთის კარიბჭესთან“ ერთ–ერთი დასაქმებული ოლეგ ჩილინგარაშვილი ამბობს, კომპანიის ხელმძღვანელობასთან შესახვედრად მუშების ნაწილი წავიდა. შეხვედრის ინიციატორი კი კომპანიის ხელმძღვანელობაა. მათ მუშებთან მოლაპარაკება მას შემდეგ გადაწყვიტეს, რაც გაიგეს, რომ ტექნიკის გაჩერებას გეგმავდნენ.

„მარტო რამდენიმე კაცი წავიდა, ქანთარიას ხვდებიან. გუშინ ტექნიკა უნდა გაგვეჩერებინა და გვითხრეს, რომ თბილისში ჩავსულიყავით და შევთანხმებულიყავით ხელფასის ამბებზე“, – ამბობს ოლეგ ჩილინგარაშვილი.

შეგახსენებთ, რომ პროტესტის მიუხედავად, ბათუმი–ახალციხის გზის რეაბილიტაციაზე დასაქმებული მუშების ნაწილს ხელფასი საერთოდ არ მიუღია, ნაწილს კი დამსაქმებელ კომპანიამ გასულ კვირას, დავალიანების მესამედი დაურიცხა.

ბათუმი–ახალციხის საავტომობილო გზის 8,5 კმ–იანი მონაკვეთის რეაბილიტაციაზე საავტომობილო გზების დეპატრამენტმა ტენდერი 2016 წლის 16 იანვარს, 8.752.530 ლარზე გამოაცხადა. ტენდერში ორი კომპანია მონაწილოებდა. გამარჯვებული შპს სამშენებლო-სამონტაჟო საექსპლუატაციო საწარმო "ჩელიაბინსკტრანსსიგნალის” საქართველოს ფილიალი გახდა. 8.5 კმ–იან მონაკვეთზე შესასრულებელი სამუშაოების ღირებულება 8 მილიონ 500 ათასი ლარით განისაზღვრა. სამუშაოები გასული წლის გაზაფხულზე დაიწყო. მშენებლობა სავარაუდოდ ორ კვირაში დასრულდება.

[ლუბა გიორგაძე, ახალციხე]