ბათუმი–ახალციხის გზის მშენებლობაზე დასაქმებულები ამბობენ, რომ ხელფასს არ აძლევენ

პროტესტის ნიშნად, 40–მდე მუშა დილიდან, ახალციხეში, გზის იმ ნაწილში შეიკრიბა, საიდანაც ბათუმი–ახალციხის მაგისტრალის მონაკვეთის რეაბილიტაცია დაიწყო (ახალციხე–ვალეს გზაგასაყაზე). იქვე იყო გაჩერებული ტექნიკაც.

„რვა თვეა გზის სამუშაოები მიმდინარეობს და ხელფასებს თითქმის ყოველ თვეში გვიგვიანებდნენ, ბოლო სამი თვის ნამუშევარი საერთოდ არ აგვიღია. თითოს 9 000 ლარამდე გვაქვს ასაღები“, – გვეუბენება ერთ–ერთი დასაქმებული თემურ ინასარიძე, რომელიც მშენებლობაზე სატვირთო მანქანით მუშაობს.

მისივე თქმით, დღეს პროტესტის გამოსახატად მუშების მხოლოდ ნაწილი შეიკრიბა. მშენებლობაზე სულ 60–მდე ადამიანია დასაქმებული და კომპანიას ყველას დავალიანება აქვს.

„ყოველ თვეში გვპირდებიან ხელფასს მოგცემთო. იმის იმედად, რომ ვმუშაობდით, სესხი ავიღე ბანკიდან, ახლა კი ვეღარ ვიხდი“, – გვეუბნება თემურ ღვინიაშვილი და ამატებს, – „სამუშაოები ისეთი გამკაცრებული იყო, მთელი დღე უნდა გემუშავა. შესვენების საშაუალებაც არ გვქონდა“.

გაფიცულებს მშენებელი კომპანიის ხელმძღვანელობასთან შეხვედრა სურდათ, თუმცა, მათთან არავინ მისულა. ამ დროისთვის მუშები დაიშალნენ, თუმცა, არც სამუშაოები გაგრძელებულა და ტექნიკაც ისევ გაჩერებულია – ნაწილი სოფელ ფარეხასთან, ნაწილი კი ახალციხე–ვალეს გზაგასაყარზე.






„სამხრეთის კარიბჭე“ სამშენებლო კომპანიასთან დაკავშირებას მთელი დღის განმავლობაში ცდილობდა, თუმცა უშედეგოდ. ხელმძღვანელობაში ჯერ არ პასუხობდნენ, შემდეგ კი გათიშეს ყველა ის ნომერი, რომელიც მოვიპოვეთ.

საქართველოს საავტომობილო გზების დეპარტამენტში განაცხადეს, რომ ტენდერში გამარჯვებულ კომპანიას ყველა ხარჯისათვის თანხა უკვე ჩარიცხული აქვს და მუშებთან პრობლემა მათ უნდა მოაგვარონ.

ახალციხე–ბათუმის საავტომობილო გზის 8.5 კმ–იანი მონაკვეთის მშენებლობის დასრულებამდე ერთი კილომეტრის რეაბილიტაციაა დარჩენილი. მუშები ამბობენ, რომ სამუშაოებს იქამდე არ გააგრძელებენ, ვიდრე კომპანია სახელფასო დავალიანებას არ დაფარავს.







[ლუბა გიორგაძე, ახალციხე]