20.000 ლარად ‘ნაყიდი’ სიჩუმე – მერიამ მშენებარე ტაძარს თანხა მაინც გამოუყო

რამდენიმე დღეა ახალციხეში, 9 აპრილის ქუჩაზე, შალვა ახალციხელის სახელობის ტაძრის ეზოში ხალხმრავლობა და სამუშაოებით გამოწვეული ხმაურია. ირკვევა, რომ ტაძრის მშენებლობა, რომელიც დიდი ხანია შეჩერებული იყო, განახლდა.

სამუშაოების დასასრულებლად, ახალციხის ადგილობრივი ბიუჯეტიდან 80.000 ლარი გამოყეს. ეს მაშინ, როდესაც, 31 იანვარს, საკრებულოს რიგით მეორე სხდომაზე, ამ საკითხის განხილვას ხმაური მოჰყვა. შეგახსენებთ, მაშინ დეპუტატებს ახალციხისა და ტაო–კლარჯეთის მიტროპოლიტის თეოდორე ჭუაძის თხოვნა გააცნეს. მეუფე თეოდორე მერიას 9 აპრილის ქუჩაზე, შალვა ახალციხელის სახელობის მშენებარე ტაძრის დასრულებისთვის დახმარებას სთხოვდა. სხდომაზე დეპუტატები 100.000 ლარის გამოყოფაზე მსჯელობდნენ. გადაწყვეტილებას ტაძრისთვის თანხის გამოყოფაზე 15–დან 11–მა დეპუტატმა დაუჭირა მხარი. საკრებულოს ოპოზიცია ფიქრობს, რომ ადგილობრივი ბიუჯეტის ფულით „რაიმე რელიგიური არ უნდა დაფინანსდეს“. ან/და, თუ დაფინანსდება, მაშინ, დისკრიმინაციული მიდგომა არ უნდა იყოს და ბიუჯეტის თანხა ყველა კონფესიას თანაბრად უნდა ხმარდებოდეს.

„შეგვიმცირდა გარკვეული თანხები და მოგვიწია აქაც მომჭირნეობით გადაგვეხადა ეს თანხა“, – ამბობს ახალციხის მერი ვლადიმერ ზედგინიძე.

აღნიშნული თანხით ტუფის ქვის შესყიდვა იგეგმება, რომელიც ტაძრის მოპირკეთებისთვისაა საჭირო.

„ნაწილი ამ თანხისა უკვე გადახდილია. მეამაყება, რომ ერთ–ერთ უმშვენიერეს შენობას დაამშვენებს ჩვენგან გაწეული გარკვეული თანხა. ჩვენი წვლილი შეგვაქვს, რომ დროულად დასრულდეს“, – აცხადებს ქალაქის მერი.

შეგახსენებთ, რომ ახალციხეში, შალვა ახალციხელის სახელობის ტაძრის მშენებლობას საფუძველი 2009 წელს ჩაეყარა. მშენებელი ერთ–ერთი კერძო პირი იყო, რომელიც გარდაიცვალა. მეუფე თეოდორეს თქმით, მას შემდეგ, რაც ტაძრის დამფინანსებელი და მშენებელი გარდაიცვალა, ყველაფერს აკეთებენ იმისთვის, რომ სახსრები, რომლებიც ეპაქრიაში შედის, ტაძრის ბოლომდე მისაყვანად დაიხარჯოს, თუმცა თანხა საკმარისი მაინც არ არის. სწორედ ამიტომ მიმართა მან ახალციხის მერიას 100 000 ლარის მოთხოვნით. მეუფემ ტაძრის მშენებლობისათვის თვითმმართველობიდან თანხა უკვე მესამედ ითხოვა. ეპარქიამ 100 000 ლარი პირველად 2015 წელს, მეორედ კი იგივე ოდენობის თანხა 2016 წელს მიიღო. მეოფე ამბობს, რომ მშენებლობის დასასრულებად დაახლოებით 700 000 ლარია საჭირო.



[თინათინ ზაზაძე, ახალციხე]