100 000 ლარი ტაძრის მშენებლობისთვის – ხმაური ახალციხის საკრებულოში [Video]
მთავარი → სიახლე, ეკონომიკა, საზოგადოება31.01.2017ახალციხეში მშენებარე შალვა ახალციხელის სახელობის ტაძრისთვის ქალაქის მერიიდან 100 000 ლარი გამოიყოფა. ეს გადაწყვეტილება ახალციხის საკრებულომ ხმუარის ფონზე მიიღო.
დღეს, 31 იანვარს ქალაქ ახალციხის საკრებულოში რიგით მეორე სხდომაზე დეპუტატებს ახალციხისა და ტაო–კლარჯეთის მიტროპოლიტის თეოდორე ჭუაძის თხოვნა გააცნეს. მეუფე თეოდორე მერიას 9 აპრილის ქუჩაზე, შალვა ახალციხელის სახელობის მშენებარე ტაძრის დასრულებისთვის დახმარებას სთხოვს.
თვითმმართველობამ ტაძრის მშენებლობისთვის თანხა 100 000 ლარი განსაზღვრა და მისი ბიუჯეტიდან გამოყოფის საკითხი კენჭისყრაზე გაიტანა.
„100 000 ძალიან ბევრია, ეკლესიას აქვს იმის საშუალება, რომ ტაძრის მშენებლობა თავად დაასრულონ. ყველაზე დიდი დაფინანსება მათ აქვთ. ცუდი არ იქნეობდა ჩვენს მრევლს სცოდნოდა იმ მილიონებიდან, რომელსაც სახელმწიფო ეკლესიას აძლევს, რამდენია გამოყოფილი ჩვენი ეპარქიისთვის“, – განაცხადა საკრებულოს ოპოზიციონერმა დეპუტატმა ჯიმშერ გოგოლაურიმა.
მისივე თქმით, თუ საკრებულო აღნიშნული ეკლესიისთვის თანხას გამოყოფს, მაშინ იგივე ოდენობის თანხა სომხური ეკლესიის კეთილმოწყობისთვისაც უნდა გამოიყოს: „მიზერულია თანხა ჯანდაცვისთვისაც. 210 000 ლარია გათვალისწინებული იმ ავადმყოფი ადამიანებისთვის ვისაც მერია აფინანსებს, დავცინით ხალხს, ვიდრე ყველა საჭირო საბუთს შეაგროვებს, ზოგი იღუპება. სწორედ ამის დაფინანსება უნდა გავზარდოთ“.
ჯიმშერ გოგოლაური საკრებულოს სხდომაზე სასულიერო პირების დასწრებასაც ითხოვდა: „მოსულიყო ვინმე მათი წარმომადგენელი და ეთქვათ ამ ფულს კონკრეტულად რაში დახარჯავენ“.
საკრებულოს სხდომას არცერთი სასულიერო პირი არ დასწრებია, თუმცა მერიის საფინანსო–საბიუჯეტო სამსახურის უფროსმა ლიანა ხმალაძემ დეპუტატებს ის დოკუმენტი გააცნო, სადაც ხარჯთაღრიხცაა გაწერილი.
ეკლესიის მშენებლობის დაფინანსების საკითხი გააპროტესტა „ერთიანი ნაციონალური მოძრაობის“ დეპუტატმა ზურა სადათერაშვილმაც: „პრინციპულად წინააღმდეგი ვარ ხალხის მიერ აკრეფილი თანხით რაიმე რელიგიური დაფინანსდეს. 200–მა კაცმა რომ 500–500 ლარი დადოს 100 000 გამოვა, თუ ვიღაცას უნდა ამ ეკლესიის აშენება და დაფინანსება მე პრობლემას ვერ ვხედავ, პირადად გადაიხადოს. არ ვუჭერ მხარს, რადგან გადასახადი იკრიბება მუსლიმიდანაც და ათეისტიდანაც“.
საბოლოოდ, 15 დეპუტატიდან ეკლესიის მშენებლობისთვის თანხის გამოყოფას მხარი არ დაუჭირა ოთხმა ოპოზიციონერმა დეპუტატმა: ჯიმშერ გოგოლაურმა, მალხაზ გიქოშვილმა, ზურაბ სადათიერაშვილმა და ირმა ხნკოაინმა. მმართველი გუნდის უმრავლესობის გადაწყვეტილებით კი 100 0000 ლარის გამოყოფა დადებითად გადაწყდა.
„იმ ეკლესიას ვინც აშენებდა გადრაიცვალა, არავისთვის არ უთქვამს იმ ადამიანს, რომ შენ გააკეთეო. ის აკეთებდა ქალაქისთვის. დღეს აღარ არის, თორემ არც არავინ მოითხოვდა დაფინანსებას. სამომავლოდ სომხური ეკლესია, თუ მოითხოვს მასაც დავეხმარებით. მე პირადად გამოყოფილ თანხას 500 ლარსაც დავამატებ“, – ამბობს უმრავლესობის წარმომადგენელი საკრებულოში მამუკა მიქელაძე.
ახალციხის მერი ვლადიმერ ზედგინიძე დარწმუნებულია, რომ საკრებულოს გადაწყვეტილებას ტაძრის მშენებლობის დაფინანსებასთან დაკავშირებით საზოგადოების დიდი ნაწილიც მხარს დაუჭერს: „ბრწყინვალე შენობაა და უნდა დასრულდეს. ჩვენ მხარდაჭერა აღმოვუჩინეთ არა ვინმეს, არამედ კონკრეტულად იმ შენობას, რომ გადავარჩინოთ. ეს ჩვენი მოქალაქეობრივი ვალია, დამერწმუნება ნებისმიერი ახალციხელი!“
მისივე თქმით, რომ არა უბედური შემთხვევა, მათ ეკლესიის დასრულებისთვის თანხის გამოყოფა არ დასჭირდებოდათ: „ტაძარი კერძო პირმა წამოიწყო, ის გარდაიცვალა. დღეს რომ ეს შენობა დამთავრდეს ამისათვის ვზრუნავთ სომხებიც და ქართველებიც. იმ ოჯახსაც ფინანსური კრიზისი აქვს და ეს შენობა „არაშენდა“ რომ არ გახდეს, ავიღეთ ჩვენს თავზე“, – განმარტავს ვლადიმერ ზედგინიძე და ამატებს, რომ ვიდრე სამუშაოები არ დასრულდება თანხას მერია არავის არ გადაურიცხავს.
როგორც ახალციხის მერიაში განმარტავენ, 100 000 ლარი ეკლესიის კედლების ბოლნისის ტუფის ქვით მოპირკეთებას და სახურავის მოწყობას მოხმარდება.
შეგახსენებთ, ახალციხეში შალვა ახალციხელის სახელობის ტაძრის მშენებლობას საფუძველი 2009 წელს ჩაეყარა. მშენებარე ტაძრისთვის ახალციხის მერიამ თანხა 100 000 ლარი 2015 წელსაც გამოყო.