მიტროპოლიტი თეოდორე: „100 000 ლარი ტაძრის მშენებლობის დასრულებას არ ეყოფა“

ახალციხეში, შალვა ახალციხელის სახელობის ტაძარის მშენებლობისათვის, მეუფე თეოდორემ 100 000 ლარი ადგილობრივი თვითმმართველობიდან ითხოვა. 31იანვრის საკრებულოს სხოდმაზე საკითხს დეპუტატთა უმრავლესობამ მხარი დაუჭირა, ნაწილმა კი ეს გადაწყვეტილება გააპროტესტა. უმცირესობა მიიჩნევს რომ „ეკლესიას აქვს საშუალება, ტაძრის მშენებლობა თავად დაასრულოს“.

მეუფე თეოდორეს თქმით, მას შემდეგ, რაც ტაძრის დამფინანსებელი და მშენებელი გარდაიცვალა, ყველაფერს აკეთებენ იმისთვის, რომ სახსრები, რომლებიც ეპაქრიაში შედის, ტაძრის ბოლომდე მისაყვანად დაიხარჯოს, თუმცა თანხა საკმარისი მაინც არ არის. სწორედ ამიტომ მიმართა მან ახალციხის მერიას 100 000 ლარის მოთხოვნით. სასულიერო პირი აქვე აღნიშნავს, რომ ამ ტაძრის მშენებლობისათვის თვითმმართველობიდან თანხა უკვე მესამედ ითხოვა. საკრებულომ კი მოთხოვნა სამივეჯერ დაუკმაყოფილა.

ეპარქიამ 100 000 ლარი პირველად 2015 წელს, მეორედ იგივე თანხა 2016 წელს მიიღო.

„წელსაც ვითხოვეთ ჩვენ ასევე 100 000 ლარი, იმისთვის, რომ დამთავრდეს პირველი რიგის სამუშაოები, ეს ნიშნავს, მოპირკეთებისა და გადახურვის სამუშაოებს“, – განმარტავს მეუფე თეოდორე.

მისივე თქმით, საკრებულოს შესაბამისი ხარჯთაღრიცხვა ყოველ ჯერზე წარედგინება.

„ძირითადი ხარჯი 100 000 ლარიდან ბოლნისის ტუფის შესყიდვაში მიდის, რომლითაც ამ ტაძრის მოპირკეთება მოხდება. 74 000 არის მუშების ანაზღაურება. დანარჩენი 20 000 ლარი სამშენებლო მასალებს ხმარდება“, – ამბობს მეუფე თეოდორე.

რაც შეეხება 25 მილიონ ლარს, რომელიც საქართველოს საპატრიარქოს 2017 წლის სახელმწიმფო ბიუჯეტიდან პირდაპირი დაფინანსების სახით გამოეყო, ამბობს, რომ ეს თანხა ტაძრების რეაბილიტაციისათვის განსაზღვრული არ არის და ის მხოლოდ განათლებასა და სოციალურ პროექტებზე იხარჯება: „არცერთ ეპარქიაზე გამოყოფილი არ არის თანხა, არცერთი მღვდელი და არცერთი სასულიერო პირი ამ თანხიდან ანაზღაურებას არ იღებს და თვითონ საპატრიარქოშიც არცერთი თეთრი არ რჩება, რჩება მხოლოდ და მხოლოდ მიზანმიმართული დაფინანსება სასწავლებლების და სოციალური სახლების“.

მისი განცხადებით, საპატრარქოსთვის გამოყოფილი 25 მილიონიდან, ახალციხისა და ტაო–კლარჯეთის ეპარქიისათვის 430 000 ლარია განსაზღვრული: „ჩვენს ეპარქიაში მოქმედებს წმინდა გრიგოლ ხანძთელის სახელობის სემინარია, რომელიც არის საფარის მონასტერში. ასევე საღვთისმეტყველო და გამოყენებითი ხელოვნების ფაკლულტეტებია ახალციხეში. ამასთან ერთად, მოქმედებს 9 სკოლა. 105 თანამშრომელია დაკავებული ჩვენს სასწავლებლებში და 700–მდე მოწაფე სწავლობს. ამიტომ ეს თანხა მთლიანად მოსწავლეებისთვის გამოიყენება“.

კითხვაზე, იღებს თუ არა ეპარქია სხვა სახის დაფინანსებას სახელწიფოსგან, მიტროპოლიტი ამბობს, რომ დაფინანსება მხოლოდ ადგილობრივი თვითმმართველობიდან მიიღეს და ეს ტაძრის მშენებლობის დასაფინანსებელი ფული იყო.

მეუფე თეოდორე აქვე ამატებს, რომ თვითმმართველობიდან ეკლესიის მშენებლობისათვის თანხის გადარიცხვა კონსტიტუციური პრინციპებს არ ეწინააღმდეგება: „საპატრიარქოსა და სახელმწიფოს შორის არის გაფორმებული საკონსტიტუციო შეთანხმება, სადაც წერია, რომ სახელმწიფო პასუხისმგებლობას იღებს, გარკვეული ანაზღაურება გადაიხადოს იმ ზარალზე, რომელიც განიცადა საქართველოს ეკლესიამ და ეს ზარალი ძალიან დიდია.“

რაც შეეხება ტაძრის დასრულებას, მიტროპილიტის ინფორმაციით, 2009 წელს, როცა ამ ტაძრის მშენებლობა დაიწყო, მისი ღირებულება 2 მილიონ ლარით განისაზღვრა.

ამ დროისათვის, მისივე ინფორმაციით, დაახლოებით 700 000 ლარამდე იქნება საჭირო იმისთვის რომ მშენებლობა დასრულდეს.

[თაკო ფეიქრიშვილი, ახალციხე]