ბორჯომში საკონკურსო კომისიამ გამგებლობის კანდიდატი შეარჩია

ბორჯომის მუნიციპალიტეტის საკრებულოს საკონკურსო კომისიის სხდომაზე დღეს გამგებლობის ექვს კანდიდატს მოუსმინეს. სხდომა მედიისთვის დახურული იყო.

საკონკურსო კომისიამ გამგებლობის კანდიდატებს ცალ-ცალკე მოუსმინა. კანდიდატები 9 წევრისაგნ შემდგარმა კომისიამ, 5- ბალიანი სისტემით შეფასა. 6 კანდიდატიდან ორმა კომისიის წინაშე წარდგომის შემდეგ კანდიდატურა მოხსნა.

კონკურსანტებში ყველაზე მაღალი, 36 ქულა, დიმიტრი ბერიძემ დააგროვა, ბერიძემ ყველაზე მეტი ხმა დააგროვა კენჭისყრის შედეგებითაც.



დიმიტრი ბერიძე ამბობს, რომ გამგებლად არჩევის შემთხვევაში მთავარი პრიორიტეტი ბორჯომელი ხალხის დასაქმება და ტურიზმის განვითარებაზე ზრუნვა იქნება.

”დავინტერესდები სოციალურ - ეკონომიკური მდგომარეობით, ხელს შევუწყობ მცირე მეწარმეებს, რომ განვითარდნენ და ადგილობრივები დაასაქმონ. ვიზრუნებ სოფლის მეურნეობის განვითარებაზე. მნიშვნელოვანია, ინვესტიციების მოზიდვა ტურიზმის განვითარების მიზნით”, - აცხადებს დიმიტრი ბერიძე.

საკრებულოს რიგგარეშე სხდომა, რომელზეც მუნიციპალიტეტის გამგებელი უნდა აირჩიონ, 22 მარტსაა დანიშნული. იმ შემთხვევაში, თუ საკრებულოს წევრების უმრავლესობა კონკურსში გამარჯვებულ კანდიდატს მხარს არ დაუჭერს, საკრებულოს თავმჯდომარეს უფლება აქვს გამარჯვებული კანდიდატი საკრებულოს წევრებს ორჯერ წარუდგინოს. არ დამტკიცების შემთხვევაში ხელახალი კონკურსი ცხადდება.

შეგახსენებთ, რომ ბორჯომის მუნიციპალიტეტის გამგებლის პოსტზე, საკრებულოს გადაწყვეტილებით, კონკურსი პირველ მარტს გამოცხადდა. ამ გადაწყვეტილებას წინ უსწრებდა საკრებულოს რიგგარეშე სხდომა, რომელიც ფიზიკურ დაპირისპირებაში გადაიზარდა და ერთ-ერთი დეპუტატისთვის შუბლის გატეხვით დასრულდა.



[თინათინ ზაზაძე, ბორჯომი]