ბორჯომში საკრებულოს სხდომა შუბლის გატეხვით დასრულდა

ნაადრევი მობილიზაცია ბორჯომის გამგეობის შენობაში

საკრებულოს სხდომა, რომელზეც მუნიციპალიტეტის გამგებლის კონკურსის წესით არჩევასთან დაკავშირებული საკითხები უნდა განეხილათ, 26 თებერვალს, 12 საათისთვის იყო ჩანიშნული. თუმცა, მუნიციპალიტეტის გამგეობის შენობაში ათეულობით ადამიანმა შეკრება გაცილებით ადრე დაიწყო. მათი ნაწილი გამგებლის კონკურსის წესით არჩევას, ნაწილი კი საკრებულოს სხდომის გადადებას ითხოვდა.

გამგეობის შენობაში იმყოფებოდნენ პარლამენტის დეპუტატები, მათ შორის, ბორჯომის მაჟორიტარი „ქართული ოცნებიდან“ გედევან ფოფხაძე და „რესპუბლიკელი“ დავით ბერძენიშვილი. შენობაში დილიდან იმყოფებოდნენ პოლიციელებიც.

ორ ნაწილად გაყოფილი ადგილობრივები

ბორჯომის მუნიციპალიტეტის გამგებლის მოვალეობის შემსრულებლად 25 ოქტომბრიდან ”რესპუბლიკელი” დავით კამკამიძეა დანიშნული. შეკრებილთა ნაწილი აცხადებდა, რომ კამკამიძე არასასურველი რეპუტაციით სარგებლობს და ახალი გამგებელი კონკურსის წესით უნდა შეირჩეს. ეს ნაწილი ამბობდა, რომ ბორჯომში გედევან ფოფხაძის მმართველობაა და იგი ცდილობს თავისი კადრების გაყვანით საყრდენი არ დაკარგოს.

”ჩვენ ვიყავით კოალიციის მხარდამჭერები, ამ ხნის განმავლობაში გედევან ფოფხაძეს გვერდით ვედექით, მაგრამ თავის ერთმმართველობით და ფეოდალური მართვის სტილით დაკარგა მხარდამჭერები. ფოფხაძის მიერ დანიშნული გამგებელი არის არაკომპეტენტური და ვერ ასრულებს თავის მოვალეობას. აქედან გამომდინარე, ყველა ვითხოვთ ჩატარდეს კონკურსი და გამოვლინდეს ღირსეული, გამგებლობის თანამდებობაზე ბრძოლას მეც ვაპირებ”, - განაცხადა გიორგი გიუაშვილმა.

მეორე ნაწილი კი ამ მოსაზრებას „ნაციონალების“ პროვოკაციად აფასებდა და აცხადებდა, რომ ”ნაციონალური მოძრაობა“ მსგავსი არეულობითა და კონკურსის გამოცხადებით გამგბელის პოსტზე საკუთარი კანდიდატურის გაყვანას ცდილობს. ამ უკანასკნელთა შორის იყო გედევან ფოფხაძეც, რომელმაც სხდომის დაწყებამდე შეკრებილებს გამგეობის შენობის ფოიეში რუპორის საშუალებით მიმართა და განაცხადა, რომ არ დაუშვებენ ”ნაციონალების” დაბრუნებას.


სხდომის დაწყების წინ საპარლამენტო უმრავლესობის წევრმა,”რესპუბლიკური პარტიის” მდივანმა დავით ბერძენიშვილმა, რომელიც ბორჯომში სპეციალურად ამ სხდომისთვის ჩავიდა, საკრებულოს თავმჯდომარეს სხდომის გადადება სთხოვა. მიზეზად, გამგეობაში არსებული დაძაბული ვითარება დაასახელა.

”ვითარება საკმაოდ დაძაბულია. საქართველოს არცერთ მუნიციპალიტეტში, სადაც კოალიციის წარმომადგენელია გამგებლის მოვალეობის შემსრულებელი, მისი გადაყენების საკითხი არ დასმულა. კოალიციას ჰყავს პოლიტიკური საბჭო, რომლის წევრიც მე ვარ და კოალიციაში არ დასმულა საკითხი ბორჯომში ხელისუფლების შეცვლის მიზანშეწონილობის თაობაზე. კოალიციის ხელმძღვანელებს გვჭირდება დრო სასაუბროდ და ამ საკითხის განსახილველად”, - განაცხადა ბერძენიშვილმა.


ბერძენიშვილის თხოვნის მიუხედავად, ბორჯომის მუნიციპალიტეტის საკრებულოს თავმჯდომარემ ბესიკ ქურდაძემ რიგგარეშე სხდომა მაინც ჩაატარა. სხდომაზე ხმათა უმრავლეოსობით, 15-ით 3-ის წინააღმდეგ, გადაწყდა, რომ გამგებლის თანამდებობაზე კონკურსი გამოცხადებულიყო.

”რიგგარეშე სხდომა დეპუტატების ერთი მესამედის მოთხოვნა იყო. ხმათა უმრავლესობით გადაწყდა, რომ გამგებლის თანამდებობაზე კონკურსი გამოვაცხადოთ. ათი დღის განმავლობაში ყველა დაინტერესებულ პირს, ვისაც სურვილი აქვს, შეუძლია შემოიტანოს განცხადებები”, - განმარტა ბორჯომის მუნიციპალიტეტის საკრებულოს თავმჯდომარემ.


საკრებულოს სხდომას ამჟამინდელმა მუნიციპალიტეტის გამგებლის მოვალეობის შემსრულებელმა დავით კამკამიძემ ფარსი უწოდა. იგი ამბობს, რომ ”ნაციონალური მოძრაობა” ცდილობს ჩაატაროს ყალბი კონკურსის იმიტაცია და საზოგადოებას ამ სიყალბეში მიაღებინოს მონაწილეობა. კამკამიძის თქმით, ნაციონალებს კანდიდატი უკვე შერჩეული ჰყავთ, რასაც კონკურსის სპეციალური პირობებიც ადასტურებს, თუმცა კონკრეტული ვინაობის დასახელებისგან თავს იკავებს.



”საკრებულოს სხდომა იყო ფარსი, რომელიც განახორციელა ”ნაციონალურმა მოძრაობამ” თავისი კანდიდატის მოსაყვანად გამგეობაში. მაგრამ, არაფერი არ გაუვათ, იქნება საკონკურსო კომისია, არჩევნები, მომავალი გვიჩვენებს რა მოხდება. ვაპირებ მივიღო კონკურსში მონაწილოება. ჩვენ ვითხოვდით კონკურსის ჩატარებას 20 მაისის შემდეგ, როდესაც პრეზიდენტს აღარ ექნება პარლამენტის დათხოვნის უფლება”, - განაცხადა კამკამიძემ.

]

საწინააღმდეგოს ამტკიცებენ ”ქართული ოცნება დემოკრატიული საქართველოს” ბორჯომის რაიონულ ორგანიზაციაში.

”ეს არის ჩვეულებრივი დემოკრატიული პროცესი. გამგებლის დროებით მოვალეობის შემსრულებელს ამოეწურა ვადა და ვითხოვთ დემოკრატიულ კონკურსს. იმიტომ ვითხოვთ, რომ ამჟამინდელი გამგებლის მოვალეობის შემსრულებელი არ სარგებლობს კარგი რეპუტაციით. ვითხოვთ გამგებლის შეცვლას და მის დემოკრატიული გზით არჩევას”, - აცხადებს თავმჯდომარის მოადგილე ზურაბ ხაჩიძე და ამატებს რომ ბორჯომის მაჟორიტარი დეპუტატის გედევან ფოფხაძის განცხადება, იმის შესახებ რომ პროვოკაცია „ნაციონალების“ დაგეგმილი იყო, სრული სიცრუეა.

”რაც შეეხება ჩვენი მაჟორიტარის და ზოგიერთების გამოსვლას, თითქოს ეს ყველაფერი მოწყობილი იყო ”ნაციონალების” მიერ და ყველა ის ადამიანი თავის კანდიდატურებს აყენებდა, იყვნენ პროვოკატორები, პირდაპირ ვაცხადებ, რომ ზუსტად ეს არის პროვოკაცია. ამ სიტყვებმა მოსახლეობა ერთმანეთთან დააპირისპირა, რის გამოც ფიზიკური შეხება განხორციელდა”, - განაცხადა ხაჩიძემ.

ვინ გაუტეხა შუბლი საკრებულოს წევრს ვეფხვია გრიგალაშვილს

დღის მეორე ნახევარში გავრცელდა ინფორმაცია, რომ საკრებულოს სხდომის დაწყებამდე, პარლამენტის დეპუტატმა, ადამიანის უფლებათა დაცვის კომიტეტის თავმჯდომარის მოადგილემ გედევან ფოფხაძემ საკრებულოს წევრ ვეფხვია გრიგალაშვილს მობილური ტელეფონი ესროლა და შუბლი გაუტეხა.

”სამხრეთის კარიბჭე” ამ ფაქტს არ შესწრებია და ვერც თვითმხილველებთან მოვახერხეთ ინფორმაციის გადამოწმება. თუმცა, შეკრებილებს შორის შუბლგატეხილი ვეფხია გრიგალაშვილი ნამდვილად იმყოფებოდა.

ბორჯომის პოლიციამ საკრებულოს წევრები მოწმის სახით დაკითხა

დღის მეორე ნახევარში შსს ბორჯომის რაიონულ სამმართველოში საკრებულოს წევრები საკრებულოში მომხდარ ინციდენტთან დაკავშირებით მოწმის სახით დაკითხვაზე დაიბარეს.

როგორ განვითარდება მოვლენები ჯერჯერობით უცნობია.


[თინათინ ზაზაძე, ბორჯომი]