ბორჯომში ტერიტორიული ორგანოს რწმუნებულები იცვლება

ბორჯომში ტერიტორიული ორგანოს რწმუნებულების კონკურსი დღეს, 25 აპრილს დილიდან მიმდინარეობდა. მასში მონაწილეობას 35 კონკურსანტი იღებდა, თუმცა ერთ-ერთი მონაწილე ინდირა კურტანიძე დაგვიანების გამო კონკურსიდან მოიხსნა.

”10-დან 11 საათამდე იყო რეგისტრაცია, ამის შემდეგ მიღება აღარ შეიძლება. ეს ქალბატონი გაფრთხილებული იყო. წერილი ელექტრონული სახითაც მიიღო და ჩვენი წარმომადგენლები ტელეფონითაც დაუკვშირდნენ. მაგრამ მას მაინც თავისი არგუმენტი ჰქონდა რომ დაეშვათ”, - ამბობს მუნიციპალიტეტის საკრებულოს თავმჯდომარე ბესიკ ქურდაძე.

ინდირა კურტანიძე საკრებულოს გადაწყვეტილებას არალეგიტიმურს უწოდებს და სასამართლოში საჩივარის შეტანას გეგმავს.

”ვარ საოციალური სტატუსის მქონე და ელექტრონულ წერილს ვერ ვნახავდი, მაგრამ დავრეკე იმ პიროვნებასთან, ვისაც სიების გამოქვეყნება ევალება და მითხრა, რომ წინასწარ გამაფრთხილებდნენ. ამის შემდეგ ტელეფონის ზარს ველოდებოდი. გუშინ საღამოს შემოსული იყო ორი ზარი. მივხვდი, რომ საკრებულოს ნომერი იყო და დავრეკე. თუმცა არავინ მიპასუხა. დღეს დილით კი როცა დავრეკე მისაღებში მითხრეს, რომ რეგისტრაცია 11 საათიდან პირველ საათამდე იქნებოდა. ახლა კი მითხრეს 11 საათამდე იყო რეგისტრაცია და დაგაგვიანდათო”, - ამბობს ინდირა კურტანიძე, რომელსაც ბორჯომის რწმუნებულის თანამდებობის დაკავება სურდა.

კურტანიძემ განცხადება საკრებულოს თავმჯდომარის სახელზეც შეიტანა. აღნიშნულ საკითხს საპრეტენზიო კომისია განიხილავს.

შეგახსენებთ, რომ საკონკურსო კომისიამ რწმუნებულების თერთმეტივე კანდიდატი უკვე შეარჩია და მათ ბორჯომის მუნიციპალიტეტის გამგებელი დიმიტრი ბერიძე ორი დღის ვადაში დანიშნავს.

[თინათინ ზაზაძე, ბორჯომი]