ბორჯომის გამგებლის პოსზტე კონკურსი გამოცხადდა

კონკურსი საჯარო სამსახურის ბიუროში ადმინისტრაციულ ვებ -გვერდზე დაიდო, სადაც ნებისმიერ დაინტერესებულ პირს შეუძლია დაწვრილებით ნახოს და გაეცნოს რა მოთხოვნებს უნდა აკმაყოფილებდეს პირი, რომელსაც სურვილი აქვს მონაწილეობა მიიღოს გამგებლის პოსტზე გამოცხადებულ კონკურსში.

დაინტერესებულ პირებს კონკურსში მონაწილეობის მიღება 10 მარტამდე შეუძლიათ. საბუთების მიღება ელექტრონულად წარმოებს.

საკონკურსო კომისია, გასული წლის ნოემბერში შეიკრიბა, კომისიაში 10 წევრი შედის. წევრების უმრავლესობა საკრებულოს დეპუტატები არიან, ნაწილი კი საზოგადოებრივი აზრის, დარბაზის და პროფკავშირების წარმომადგენლები.

საკრებულოს რიგგარეშე სხდომაზე საკრებულოს წევრთა ნაწილმა კონკურსის მეტი გამჭირვალობის მიზნით, საკონკურსო წევრთა რაოდენობის გაზრდა მოითხოვა. საკრებულოს თავმჯდომარე ამბობს, რომ წევრთა რაოდენობის გაზრდა შესაძლებელია და ამ საკითხთან დაკავშირებით შეთანხმებას არ გამორიცხავს.

როგორც ბესიკ ქურდაძემ განმარტა, ბორჯომს ახალი გამგებელი სპეციალური პროცედურული ნორმების გავლის შემდეგ დაახლოებით 20 დღის ვადაში ეყოლება.

[თინათინ ზაზაძე, ახალციხე]