რამდენიმე წელია გრიგორიანების ოთხსულიანი ოჯახი, ცოლ–ქმარი და მათი ორი არასრულწლოვანი შვილი, სახლის დანგრევის შიშით ცხოვრობს. მათ შიშს, ერთის მხრივ მეზობლად მაღაზიის მშენებლობისას დაბზარული კედლები იწვევს, მეორეს მხრივ, კი გრიგორიანებს ეშინიათ, რომ მეზობლებმა შეიძლება მათ სახლი წაართვან.
ორ ოთახს ერთმანეთთან გრძელი კორიდორი აკავშირებს. შენობა, ფანჯრების სიმცირის გამო, ცუდადაა განათებული. ერთ ოთახში ღუმელი დგას, მეორეში კი ორი საწოლი. სახლში ყველა კუთხე დაბზარულია. ბზარებია გრიგორიანების არასრულწლოვანი შვილების საწოლ ოთახშიც. მშობლები შიშობენ, რომ ამ ბზარების გამო ძველი სახლი ბავშვებს თავზე ჩამოენგრევათ. საწოლებს მუდმივად ადგილს უცვლიან. კედლებზე ბზარების დასაფარად ხალიჩაა დამაგრებული.
ჯულიეტა გრიგორიანის თქმით, სამი წელია, რაც მათ ოჯახსა და მეზობლებს: ფამბუხჩიანებსა და კორკოტიანებს შორის დაპირისპირებაა. სამი წლის წინ გრიგორიანების სახლის ახლოს მდგომი ძველი სახლი არტავაზდ ფამბუხჩიანმა იყიდა, რათა პატარა სახლის ადგილას მაღაზია აეშენებინა. ჯულიეტა გრიგორიანი გვიამბობს, რომ პრობლემები სწორედ აქედან დაიწყო.
მაღაზიის ასაშენებლად ფამბუხჩიანს უნდა აეღო კედელი, რომელიც გრიგორიანების სახლს ემიჯნებოდა. ამას კი შესაძლოა ამ უკანასკნელების სახლის დანგრევა გამოეწვია.
’’ჩვენი სახლი ძველია, 60–იან წლებშია აშენებული. ვეუბნებოდი, თუ კედელს აიღებ, ჩემი სახლი დაინგრევა-თქო, მაგრამ ამბობდა, რომ მაინც აიღებდა. ნებას არ ვაძლევდით, ამიტომ პოლიციაში გვიჩივლა და მეუღლე დააპატიმრეს. როდესაც ჩემს ქმართან წასული უკან დავბრუნდი, კედელი აღებული დამხვდა”, - გვიამბობს ჯულიეტა გრიგორიანი.
პრობლემები ამით არ ამოწურულა.
’’ერთ დღეს, ჩვენს სახლს ამწე მოუახლოვდა, რომელიც მაღაზიის სახურავისთვის რკინას მოათრევდა. ვუთხარი, რომ თუ ამ რკინას დაადებდა, ჩვენი ძველი სახლი დაინგრეოდა, მიპასუხა - მე მაღაზიას ვაშენებო!“ – იხსნებს ჯულიეტა.
ზიანის ანაზღაურების მოთხოვნით შესაბამისი ორგანოებისთვის მიმართვა გრიგორიანებმა რატომღაც არ ისურვეს და პრობლემის მოგვარებას მუდმივად კამათით ცდილობდნენ.
ჯულიეტა გრიგორიანის თქმით, მას შემდეგ, რაც მეზობლებთან უსიამოვნება აქვთ, ოჯახის უფროსს რაფიკ გრიგორიანს პოლიციამ რამდენჯერმე მოაკითხა, თუმცა, ქალბატონს ამის მიზეზის ახსნა არ შეუძლია.
გრიგორიანების ოჯახს მათი სახლის მაღაზიის მშენებლობისგან დაზიანების გარდა მეზობლებთან სხვა პრობლემებიც აქვთ. ძირითადი პრობლემა ეზოა, სადაც მაღაზიის კარი გამოდის და სხვა მეზობლების ფანჯრებიც იყურება. როგორც ჯულიეტა გრიგორიანი ამტკიცებს, მეზობლებს მათი პატარა ეზოს წართმევა უნდათ. ეზოს თემაზე დაპირისპირება მაღაზიის მშენებლობის შემდეგ დაიწყო.
ორი არასრულწლოვანი, 10 და 12 წლის ბავშვის პატრონ, გაჭირვებულ ოჯახს აღარავინ ეგულება, ვისაც დახმარებისა და დაცვისთვის მიმართავდნენ. როგორც ჯულიეტა გრიგორიანი ამტკიცებს, მათ გამგეობასაც მიმართეს, საკრებულოსაც, რეგიონის გუბერნატორამდეც კი მიაღწიეს, თუმცა, მისი თქმით, დახმარებაზე ყველა უარს ეუბნებოდა. მათი უკანასკნელი იმედი საქართველოს პრემიერ მინისტრი ბიძინა ივანიშვილია, რომლის სახელზეც გრიგორიანები მათი ოჯახის უფლებების დაცვის თხოვნით წერილის დაწერას აპირებენ.
„მივმართე ორ პროკურორს, ნაირი ირიციანს, ყველას მივმართე. ახალციხეშიც ვიყავი, სადაც ჩვენი დოკუმენტები სერიოზულად არც მიიღეს. გუბერნატორთანაც ვიყავი, სადაც მითხრეს, რომ ჩვენი დოკუმენტები არ აინტერესებთ. სად წავიდე?!“, – ამბობს იგი.
60–იანი წლების ყიდვა–გაყიდვის დოკუმენტებით ეზო, რომელიც მეზობლებთან შემდგომი დაპირისპირების საგნად იქცა, გრიგორიანების ოჯახს ეკუთვნის. ჯულიეტა გრიგორიანს ეშინია, რომ მათ სახლსაც წაართმევენ და ყველა უბედურების მიზეზად მიიჩნევს ფაქტს, რომ არტავაზდ ფამბუხჩიანი, ბანკის ყოფილი მენეჯერი გავლენიანი ადამიანია, იგი კი ერთ გაჭირვებულ ოჯახს წარმოადგენს და ამიტომაც ყველაფერი, რაც კეთდება, ფამბუხჩიანის სასარგებლოდ კეთდება.
არტავაზდ ფამბუხჩიანმა გრიგორიანებთან დაკავშირებულ კითხვებზე პასუხზე უარი განგვიცხადა და მიგვითითა, რომ ამ საკითხით არ შევაწუხოთ, რადგან არსებობს სასამართლო საქმე და პასუხები შეგვიძლია იქ ვეძებოთ.
სასამართლო განხილვასთან დაკავშირებით გრიგორიანებმა თავად კარგად ვერაფერი აგვიხსნეს – რა მიზეზი ედო საფუძვლად ამ განხილვას, რა გადაწყვეტილება იქნა მიღებული. მხოლოდ გვითხრეს, რომ საქმე ადვოკატის არყოლის გამო წააგეს, რომლის დაქირავების საშუალებაც არ გააჩნდათ.
გრიგორიანების მონაწილეობით განხორციელებული სასამართლო განხილვის შესახებ ინფორმაციის მისაღებად ”სამხრეთის კარიბჭემ” რაიონულ სასამართლოს წერილობითი მოთხოვნა გაუგზავნა. სასამართლო პროცესის დეტალებს და გრიგორიანების ეზოს პრობლემას უახლოეს ნომერში გაგაცნობთ.
ამ დროს კი ჯულიეტა გრიგორიანის ოჯახი შიშობს, რომ შეიძლება არა მხოლოდ ეზო დაკარგოს, რომელიც დაპირისპირებისა და სასამართლო გარჩევების საბაბი გახდა, არამედ მთელი სახლიც.
[ქრისტინა მარაბიანი, ახალქალაქი]