სოფელ კიკიბოში სამ ოჯახს სახლი ენგრევა

ბოლქვაძეების სახლი

ორსართულიან ხისგან აწყობილ სახლში კიკიბოელი რეზო ჭელიძე ათ წელზე მეტია, ხუთ მცირეწლოვან შვილთან ერთად ცხოვრობს.

სახლის პირველი სართული, საქონლის სადგომია, ხოლო მეორე სართული საცხოვრებელი. სახლის გარშემო ფიცრები ძველია და დამტვრეული, ამიტომ კედლის ნაწილი ახალი ფიცრებითაა გამაგრებული.

„ხუთ შვილთან და მეუღლესთან ერთად ვცხოვრობ, როდის დაინგრევა სახლი არ ვიცი. ხის მასალა რომ მქონდეს გავამაგრებ და საყრდენი ექნება“, – ამბობს ადგილობრივი რეზო ჭელიძე.

ჭელიძეების მეზობლად, ბოლქვაძეების სახლში კი ოთახებსა და აივანზე ფიცრები სიძველის გამო ჩანგრეულია.

„სულ ორი ოთახი გვაქვს და იქაც ნორმალურად ვერ შევდივართ, ხის კედელიც ჩაწეულია და როდის ჩაინგრევა არ ვიცი, დღითიდღე საფრთხის შემცველი ხდება“, – გვეუბნება დავით ბოლქვაძე.

გობაძეების სახლში კი როგორც გარეთ ისე წვიმს, ოჯახს არც იმის რესურსი გააჩნია, რომ სახურავი გადახუროს.

„ექვსი წელია რაც ამ სახლში ვცხოვრობ, სესხით ვიყიდე და ჯერ არ გადამიხდია, მაგრამ თავიდან გასაკეთებელი მაქვს სახლი. მთელს სახლში წვიმა ჩამოდის“, – გვეუბნება დალი გობაძე.

ჭელიძეები, ბოლქვაძეები და გობაძეები ამბობენ, რომ ადიგენის მერიას ხის მასალის თხოვნით, საცხოვრებელის გასამაგრებლად, არაერთხელ მიმართეს, თუმცა მათი თქმით, რეაგირება არ მოჰყოლია: „უკვე აღარაფრის იმედი არ მაქვს, არც ტყეში გვრთავენ შესვლის ნებას და არც თვითონ გვაძლევენ“.

ადიგენის მუნიციპალიტეტის მერიაში კი ირწმუნებიან რომ, კიკიბოდან სახლების გასამაგრებლად, მასალის მოთხოვნით არცერთი განცხადება არ შესულა, თუმცა რადგან ადგილობრივები მოითხოვენ, მათ მდგომარეობას თვითმმართველობა შეისწავლის და შესაბამისად დაეხმარებიან კიდეც: „სოფლის რწმუნებულისთვისაც არაფერი უთქვამთ არათუ მეირაში მოსულიყვნენ. რომ მოემართათ მერია დაეხმარებოდა იმ მასალით, რითიც შეძლებდა“.

კიკიბოს მკვიდრები ამბობენ, რომ დანგრევის პირას მყოფი სახლები საუკუნეს ითვლის.


ბოლქვაძეების სახლი


გობაძეების სახლი


გობაძეების სახლი


გობაძეების სახლი


ჭელიძეების სახლი

[ლუბა გიორგაძე, ადიგენი]