მეზობლებმა 71 წლის ქალი სახლში გამოკეტეს

ჯულიეტა გასპარიანი ახალციხეში, კლდიაშვილის 20 ნომერში ცხოვრობს. მასთან გასაუბრება მხოლოდ მეზობლის ეზოდან არის შესაძლებელი.

”დამეხმარეთ, საკუთარ სახლიდან ვეღარ გამოვდივარ, საჭმელი არ მაქვს და წყალი”, - სამი დღეა უშედეგოდ სთხოვს დახმარებას ქუჩაზე ნებისმიერ გამვლელს. გამვლელებს მისი ხმა ესმით, მაგრამ დახმარება არავის შეუძლია.

შენობაში, რომელსაც ერთი შესასვლელი აქვს, გასპარიანის ახლობლებიც ცხოვრობენ. ერთი შესასვლელით სარგებლობა 71 წლის ქალბატონს ახლობლებმა რამდენიმე წლის წინ აუკრძალეს. წლების განმავლობაში გარე სამყაროს მეზობლის ეზოს საშუალებით უკავშირდებოდა. დაახლოებით სამი დღის წინ მეზობელმა რობერტ მკრტიჩიანმა იმის გამო, რომ საცხოვრებელი ბინა გაეყიდა, შესასვლელი აგურით ამოაშენა. გასპარიანი გარეთ გამოსვლას ვეღარ ახერხებს.

”ორი თვეა ბინა გავყიდე. ახალი მფლობელი მეუბნებოდა ჩემს ეზოში სხვას არ ვატარებ და ამოაშენეო. იძულებული გავხდი ასე მოვქვეულიყავი. სანამ აქ ვცხოვრობდი, პრობლემა არ იყო, სახლში ჩემი ეზოს საშუალებით შედიოდა”,-ამბობს რობერტ მკრტიჩიანი.

ჯულიეტა გასპარიანმა დასახმარებლად პოლიციაშიც დარეკა.

”მოვიდნენ, მაგრამ არაფერი შეცვლილა. კიდევ უნდა დავრეკო. ხომ შეიძლება ვინმე დამეხმაროს. გარეთ ვერ გავდივარ, პენსია რომ ავიღო და რამე ვიყიდო, შიმშილით ხომ არ უნდა მოვკვდე?!”- ამბობს იგი.

ანდრანიკ მკრტიჩიანი, რომელიც ამავე შენობაში ცხოვრობს, სახლში არ დაგვხვდა. მეზობლები ადასტურებენ, რომ მკრტიჩიანმა წლების წინ კარი მართლაც დაკეტა და მარტოხელა ქალბატონს შესასვლელით წლებია არ უსარგებლია.

”ძალიან რთული სიტუაციაა. როგორ შეიძლება ადამიანი ჩაკეტო და გარეთ გასვლის საშუალება არ მისცე. არავინ მისი პატრონი არ არის, რომ ყურადღება მიაქციოს. ამ მეზობელმაც რა ქნას, სახლს ისე ვერ ყიდდა, თუ კედელს არ ამოაშენებდა. აბა ვინ მოგცემს თავის ეზოში სიარულის უფლებას?!”, -ამბობენ კლდიაშვილის ქუჩის მცხოვრებლები.

პოლიციაში გვითხრეს, რომ კომენტარს ზემდგომთან შეტანხმების შემდეგ გააკეთებენ. ვრცლად ამ ამბის შესახებ ”სამხრეთის კარიბჭე” ხვალ გიამბობთ.

[თინათინ ზაზაძე, ახალციხე]