ახალციხეში ავტოსაგზაო შემთხვევის შედეგად 5 ადამიანი დაშავდა

შემთხვევა დღეს, 21 აპრილს, საღამოს მოხდა. როგორც ერთ–ერთმა თვითმხილველმა "სამხრეთის კარიბჭეს" განუცხადა, ერთმანეთს სატვირო ავტომობილი, ე.წ. ტრაილერი და მსუბუქი ავტომობილი შეეჯახნენ.

შეჯახების შედეგად დაშავებული ხუთი ადამიანი, სასწრაფო დახმარების სამსახურმა სამედიცინო დაწესებულებებში გადაიყვანა, სამი მათგანი კლინიკა "იმედში", ორი კი ახალციხის რეფერალურ ჰოსპიტალში.

"14 წლის გოგონას გატეხილი აქვს ცხვირის ძვალი, მამაკაცს ხელის ძვალი, ქალბატონს კი თავის ზედაპირული ტრამვა აქვს ჭრილობებით. სერიოზული არცერთი არ არის. ამბულატორიულ დაკვირვებას გადიან და გავწერთ ბინაზე", – განუცხადეს "სამხრეთის კარიბჭეს" კლინიკა "იმედში".

სერიოზული დაზიანებები არც ახალციხის რეფერალურ ჰოსპიტალში შეყვანილ დაშავებულებს ჰქონდათ.

"ორი დაზარალებული შემოიყვანეს, ჩაუტარდათ შემოწმება და უკვე გაწერეს", – განაცხადეს ახალციხის რეფერალურ ჰოსპიტალში.

შსს–ს საზოგადოებასთან ურთიერთობის სამსახურის ინფორმაციით, მომხდარზე ძიება სისხლის სამართლის კოდექსის 276–ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების, ან ექსპლუატაციის წესის დარღვევას გულისხმობს.







[sknews.ge]