რით დაეხმარება ახალციხის მერია ხანძრით დაზარალებულებს

ახალციხეში, მესხეთის ქუჩაზე, გუშინ, 20 მარტს გაჩენილი ხანძრის შემდეგ, სამი ოჯახის მიერ მიღებული ზარალის ოდენობას ახალციხის მერიის ინფრასტრუქტურის სამსახური სწავლობს.

„როგორც კი შეისწავლიან და ზარალის ოდენობა გვეცოდინება, შევეცდებით, რომ იმ შეზღუდული შესაძლებლობიდან, რაც ბიუჯეტში გვაქვს, მაქსიმალურად დავეხმაროთ“, – ამბობს ახალციხის მერი ვლადიმერ ზეგინიძე.

მისი თქმით, ქალაქის ბიუჯეტში ხანძრით დაზარალებულებისთვის სპეციალური მუხლია გაწერილი. ამ მუხლში, მთელი წლისთვის, 6 000 ლარია გათვალისწინებული.

რაც შეეხება სარეზერვო ფონდს, 2017 წლის ბიუჯეტში მისი ოდენობა 100 000 ლარია, აქედან 5 729 ლარი უკვე გახარჯულია, ამდენად, ქალაქის მერიამ, გაუთვალისწინებელი შემთხვევებისთვის, 94 271 ლარი უნდა იკმაროს.

„სარეზერვო ფონდიდან, სავარაუდოდ, მაქსიმუმ თითო ოჯახისთვის 1000 ლარი გამოვყოთ, მაგრამ, ჯერ ზუსტად ვერაფერს ვიტყვი, თუ ყველაფერი არ დავთვალეთ და შევაფასეთ“, – ამბობს ვლადიმერ ზედგინიძე და ამატებს, რომ სამივე დაზიანებულ სახლს გადასახურად ხე მასალა სჭირდება, – მთელი ჭერი ჩამოქცეულია, თამარ გოგოლაძის სახლს აივანიც დაეწვა“.

შეგახსენებთ, რომ ახალციხეში, მესხეთის ქუჩაზე, N27–ში მდებარე საცხოვრებელი სახლის სახურავზე ხანძარი 20 მარტს, დაახლოებით 23:00 საათზე გაჩნდა. ქარის გამო კი ცეცხლი გვერდით მდგომ N25 და N23 სახლების სახურავებსაც მოედო. შემთხვევის შედეგად არავინ დაშავებულა.

ხანძრის გაჩენის მიზეზი ამ დროისთვის უცნობია. მომხდარზე ძიება სისხლის სამართლის კოდექსის 187–ე მუხლის მეორე ნაწილით მიმდინარეობს, რაც სხვისი ნივთის დაზიანებას ან განადგურებას გულისხმობს.

[თამუნა უჩიძე, ახალციხე]