ახალციხეში, ნახანძრალი სამი ოჯახიდან, ორი თავს ახლობლებთან აფარებს

მესხეთის ქუჩის N27, N25 და N23–ში, სეთურიძეების, ასპანიძეებისა და ბერიძეების, გვერდიგვერდ მდებარე სახლებს, ცეცხლი 20 მარტს მოედო. ხანძრმა განსაკუთრებით N27, N25–ში მცხოვრებლები დააზარალა და ამ დრომდე, ორივე ოჯახი, თავს ახლობლების ოჯახს აფარებს.

სამი დაზარალებული ოჯახიდან, სახურავის შეკეთება ჯერ არცერთს დაუწყია, ამბობენ, რომ ფინანსურ დახმარებას ელოდებიან.

„რაც დავითვალეთ, 6.000 ლარის ზარალია. ჩვენ არ გვაქვს საშუალება, ამიტომ ველოდებით მერია როდის ჩაგვირიცხავს, რომ გადახურვა დავიწყოთ“, – ამბობს N23–ში მცხოვრები ირინა გაბრიჩიძე.

გაცილებით დიდი ზარალი მიიღეს ასპანიძეებმა. ზედაპირული გათვლებით, მათი ზარალი 30.000 ლარია.

„ფაქტობრივად, ქუჩაში ვართ, ნათესავთან ვათენებთ ღამეს. ხვალ ვაპირებთ სახურავის დამწვარი ნარჩენებისგან გაწმენდას, სავარაუდოდ კედლებიც ახლად ამოსაშენებელია, რადგან წყალმა დაასველა და დააზიანა“, – ამბობს მესხეთის N27-ში მცხოვრები თამარ გოგოლაძე და ამატებს, რომ მსგავს ვითარებაშია N25–ში მცხოვრები ბერიძეების სახლიც.

ახალციხის მერიამ ხანძრისგან მიყენებული ზარალი უკვე დაითვალა. მერიაში ამბობენ, რომ თითოეულ ოჯახს, დაახლოებით, 2.500 ლარს გამოუყოფენ. ასევე, სამივე ოჯახს საშუალება ექნება ტყიდან სახურავის გადასახურად მასალა უფასოდ გამოიტანოს.

„გადარიცხვა მზადების პროცესშია, ასევე, შესაბამის ორგანოებთან დავაყენეთ შუამდგომლობა, პირველი ხარისხის მორზე, სახურავის გადასახურად“, – ამბობს ახალციხის მერიის საზოგადოებასთან ურთიერთობის განყოფილების უფროსი ნინო ბლუაშვილი.

შეგახსენებთ, რომ ახალციხეში, სამი საცხოვრებელი სახლის სახურავი 20 მარტს დაიწვა. ხანძარი ჯერ ერთ სახლზე გაჩნდა და ქარის გამო მეზობელ სახლებზეც გადავიდა. ხანძარს შვიდი ჯგუფი რამდენიმე საათის განმავლობაში აქრობდა. შემთხვევის შედეგად არავინ დაშავებულა.

ხანძრის გაჩენის მიზეზი ამ დროისთვის უცნობია. მომხდარზე ძიება სისხლის სამართლის კოდექსის 187–ე მუხლის მეორე ნაწილით მიმდინარეობს, რაც სხვისი ნივთის დაზიანებას ან განადგურებას გულისხმობს.

[თინათინ ზაზაძე, ახალციხე]