დამწვარი სახურავები, ჩანგრეული ჭერი და ჩარეცხილი კედლები – ხანძარმა სამი ოჯახი დააზარალა

ხანძარმა მესხეთის ქუჩაზე N27, N25, N23-ში მდებარე სახლები დააზიანა. როგორც ადგილობრივები ყვებიან, ცეცხლი თავდაპირველად N27 სახლის სახურავს მოედო და შემდეგ მეზობელ სახლებზე გადავიდა. ერთ–ერთი დაზარალებული, ვის სახლსაც სახურავი დაეწვა, ამ დროს სასწრაფო სამედიცინო სამსახურში, მორიგე იყო.

„შეტყობინება შემოვიდა მესხეთის 27–ში ხანძარიაო, ჩემი მეზობელია–მეთქი და ჩვენი კჯგუფი გამოვიქეცით, მოვედი და ვნახე, რომ ცეცხლი უკვე ჩემს სახლზე გადადიოდა“, – ამბობს ექიმი თამარ გოგოლაძე.

მისი თქმით, მისი სახლის სახურავი დაიწვა, ოთახები კი წყლის ნაკადმა ჩარეცხა. გაცილებით უფრო მძიმე მდგომარეობაშია N27–ში მდებარე სახლი, რომელიც მთლიანად ჩაინგრა. ამ სახლიდან მეზობლებმა მხოლოდ ავეჯის გამოტანა მოასწრეს. საოჯახო ნივთები ამ დრომდე ქუჩაში აწყვია და მას მეზობლები ამ ღამით თავინთ სათავსოებში აბინავებენ.

მესხეთის ქუჩაზე ამ დრომდე რჩება 6 სახანძრო ბრიგადა. ჯგუფები მეზობელი მუნიციპალიტეტებიდანაც ჩამოვიდნენ. ხანძრი ლოკალიზებულია, მისი გავრცელების საფრთხე აღარ არსებობს,თუმცა, ჯერ ბოლომდე ჩამქრალი არ არის.

ამ დროისათვის უცნობია ხანძრის გამომწვევი მიზეზი.

„როგორც მეზობელი ამბობს, სახლში მოულოდნელად შუქი გათამაშდა და ამ დროს, კარზე კაკუნიც იყო, თქვენ სახლში ხანძარიაო. რა შეიძლება ყოფილიყო მიზეზი, ამას ალბათ ჯევ ვერ გავიგებთ“, – ამბობს თამარ გოგოლაძე.

შემთხვევის ადგილზე ისევ იმყოფება ახალციხის მერი ვლადიმერ ზედგინიძე. ადგილზე არიან „ენერგო–პრო ჯორჯიას ახალციხის სერვის–ცენტრის მენეჯერი და თანამშრომლებიც. დასახლების მიმდებარე ტერიტორიას ელექტროენერგია არ მიეწოდება.

შეგახსენებთ, რომ ახალციხეში, მესხეთის ქუჩაზე ერთი საცხოვრებელი სახლის სახურავზე ხანძარი დაახლოებით 23:00 საათზე განჩდნა, თუმცა ქარის გამო ცეცხლი გვერდით მდგომ ორი სახლის სახურავსაც მოედო. შემთხვევის შედეგად არავინ დაშავებულა.

მომხდარზე ძიება სისხლის სამართლის კოდექსის 187–ე მუხლის მეორე ნაწილით მიმდინარეობს, რაც სხვისი ნივთის დაზიანებას ან განადგურებას გულისხმობს.











[ნინო ნარიმანიშვილი, ახალციხე]