ხანძარი ახალციხეში – ცეცხლი 5 სახლს მოედო [Photo]

შემთხვევა დღეს, 2 აპრილს, მოხდა. კოსტავას ქუჩაზე ხანძარი, მამუკაშვილების, ნატრიაშვილების, ბაღდოშვილების, მერაბიშვილებისა და კიდევ ერთ დაკეტილ სახლს მოედო, რომლის მეპატროონებიც უკვე წლებია რუსეთში ცხოვრობენ. ცეცხლი გამთენიას, დაახლოებით 06:00 საათზე გაჩნდა. ოთხივე ოჯახმა გარეთ გამოსვლა მოასწრო.

„დილით ადრე გამოვედი, ახალქალაქში გოჭების საყიდლად მივდიოდი, დავინახე სახლზე ცეცხლი იყო მოდებული, მივედი, ბავშვები გამოვიყვანე, სახანძრო გამოვიძახეთ და ავეჯი გამოვზიდეთ“, – ამბობს ნუგზარ მერაბიშვილი, რომლის სახლის სახურავიც ნაწილობრივ დაიწვა.

როგორც დაზარალებულები ყვებიან, ხანძარი სავარაუდოდ მამუკაშვილების სახლის სახურავს, გაუმართავი ელექტროგაყვანილობის გამო გაუჩნდა, შემდეგ კი ცეცხლი გვერდით მდგომი სახლების სახურავებს მოედო.

„გუშინ, დილით, მარტო ჩვენთან ჩაქრა შუქი, დავრეკე კომპანიაში, მრიცხველის ბრალიაო და მალევე აღადგინეს. ალბათ ხანძარიც ამან გამოიწვია, რადგან სახურავში გაჩნდა და თან, ღუმელი საერთოდ არ ამინთია“, – გვეუბნება თამარ მამუკაშვილი, რომელიც ხანძრისაგან ყველაზე მეტად დაზარალდა.

მამუკაშვილებისა და მის გვერდით სახლს, რომელიც წლებია დაკეტილია, სახურავი საერთოდ აღარ აქვს. საცხოვრებლებიდან ავეჯი და ნივთების მეზობელთან გადაიტანეს.

„მარტო ის მახსოვს, რომ ბავშვები სახლიდან გამოვიყვანე. მეზობლებმა გამოზიდეს ავეჯი, ამ სახლში როგორ უნდა ვიცხოვრო არ ვიცი“, – ამბობს თამარ მამუკაშვილი.

რაც შეეხება ნატრიაშვილებსა და ბაღდოშვილებს, მათაც სახურავის ნაწილი დაეწვათ.

შემთხვევის ადგილზე ბორჯომისა და ახალციხის 8 სახანძრო ბრიგადა მუშაობდა. მეხანძრეები ხანძრის ლოკალიზებას ორი საათზე მეტხანს ცდილობდნენ. კიდევ ორი საათი კი ხანძრის ბოლომდე ჩაქრობას დასჭირდა.

დამწვარი სახურავებიდან სახლებში წვიმა რომ არ ჩავიდეს, მეხანძრეებმა და მაშველებმა დაზიანებულ სახლებს ცელოფნები გადაახურეს.
ხანძრის გამომწვევ მიზეზს შინაგან საქმეთა სამინისტრო იკვლევს. მომხდარძე ძიება 187–ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.

შეგახსენებთ, ბოლო ორ კვირაში, ეს უკვე მეორე შემთხვევაა, როცა ერთი სახლის სახურავში გაჩენილი ცეცხლი მეზობელ სახლებზეც გადადის. სამი საცხოვრებელი სახლის სახურავი დაიწვა 21 მარტს, მესხეთის ქუჩაზეც. ბოლო ორ კვირაში, ორი შემთხვევის შედეგად, რვა სახლის სახურავია დამწვარი.


























[ლუბა გიორგაძე, ახალციხე]