ახალციხის გამგეობამ ფოტოკონკურსში გამარჯვებულები დააჯილდოვა

ღონისძიება ახალციხის მუნიციპალიტეტის კულტურის სამსახურის ინიციატივით ჩატარდა. ფოტოკონკურსში მონაწილეობა 15–დან 29 წლამდე ასაკის ახალგაზრდებს შეეძლოთ. ფოტოები მათ კულტურის სამსახურისთვის, ელექტრონულად უნდა გადაეგზავნათ. ერთ მონაწილეს მხოლოდ ერთი ფოტოს გაგზავნა შეეძლო. ჯამში, კულტურის სამსახურში 37 ფოტო შევიდა.

"კონკურსში ყველა სურათმა მიიღო მონაწილეობა. ჟიურის მივანდეთ არჩევა, რომელი ფოტო იყო საუკეთესო“, – განაცხადა ახალციხის მუნიციპალიტეტის კულტურის სამსახურის უფროსმა მაია სხირტლაძემ.

ხუთწევრიანი ჟიური, გუბერნიისა და გამგეობის თანამშრომლების, მედიის წარმომადგენლებისა და მხატვრებისგან შედგებოდა. 37 ფოტოდან, რომლებიც დაბეჭდილი და გამოფენილი იყო, ჟიურიმ ორი საუკეთესო შეარჩია. პირველი ადგილი ბორჯომის ტელევიზიის ჟუნალისტის ნინო ჯიქურაშვილს ფოტომ მოიპოვა, ხოლო მეორე ადგილზე სოფელ ჭვინთაში მცხოვრები ოლიკო ჩინჩალაძის ფოტო გავიდა.

"ჩემს ფოტოზე ასახულია ბერი სოფელ საირმეს მონასტერში, რომელიც მარტო ცხოვრობს და ჰყავს ძაღლი, მისი მეგობარი. ეს სურათი წინასწარ არ შემითახმებია, არის ბუნებრივი და ძალიან კარგი“, – ამბობს პირველი ადგილის მფლობელი ნინო ჯიქურაშვილი.

გამარჯვებული ფოტოს ავტორებს ფოტოაპარატები გადაეცათ, კონკურსში მონაწილე ყველა ახალგაზრდა კი სიმბოლური საჩუქრებით დასაჩუქრდა.

კულტურის სამსახურის განმარტებით, საჩუქრებისთვის ადგილობრივი ბიუჯეტიდან 800 ლარი დაიხარჯა.

„ფოტოკონკურსი არის ჩვენი რიგითი ღონისძიება, რომელიც ყოველწლიურად ტარდება და ტრადიციად იქცა. ახალგახრდები ძალიან დაინტერესებულები არიან ასეთი ღონისძიებით", – გვითხრა მაია სხირტლძემ.







[თინათინ ზაზაძე, ახალციხე]