ახალციხის გამგეობამ ფოტოკონკურსის გამარჯვებულები გამოავლინა

ფოტოკონკურსი სახელწოდებით „ჩემი სოფელი“ ახალციხის გამგეობამ ერთი თვის წინ გამოაცხადა. თვითმმართველობაში საკუთრი ნამუშევარი მუნიციპალიტეტის თვრამეტი სოფლის ახალგაზრდამ შეიტანა.

მონაწილეების ფოტოებზე უმეტესად სოფლის პეიზაჟები, ცხოველები, ისტორიული ძეგლები და ბავშვები იყვნენ წარმოდგენილი.


გამარჯვებული ფოტო

შვიდ კაციანმა ჟიურიმ, საბოლოოდ, სამი საპრიზო ადგილი დაასახელა. პირველი ადგილი დაიკავა ნელი გაჩეჩილაძის ფოტომ სახელწოდებით „ბიჭუნა კატასთან ერთად“.

"ჩემს გმირს ნიკუშა ჰქვია, ერთხელ დავინახე, როგორ მუშაობდა სოფელში, მივედი და ვუთხარი ცოტა ხნით უნდა მოგაცდინო - მეთქი, შემდეგ კატაც გამოჩნდა, რამაც კადრის დაჭერაში ხელი შემიწყო“,- განმარტა ფოტოს ავტორმა.


ფოტოკონკურსის გამარჯვებულები

კონკურსის მეორე და მესამე ადგილებზე ქალაქ ვალიდან ქრისტი ხითარიშვილი და სოფელ მუსხიდან ნინო ინასარიძე გავიდნენ.

საპრიზო ადგილების მფლობელებს საჩუქრად ფოტოაპარატები და სურათები გადაეცათ. სიმბოლური პრიზები მიიღო ყველა მონაწილემ.

ფოტოკონკურსისათვის ადგილობრივი თვითმმართველობიდან 450 ლარი გამოიყო. თანხა ფოტოების დაბეჭდვასა და საჩუქრების შეძენას მოხმარდა.


პირველი ადგილის მფლობელი ნელი გაჩეჩილაძე

[თაკო ფეიქრიშვილი, ახალციხე]