ახალციხის გამგეობამ ფოტოკონკურსის გამარჯვებულები გამოავლინა

ახალციხის მუნიციპალიტეტის გამგეობის მიერ თავისუფალ თემაზე გამოცხადებულ კონკურსში სხვადასხვა ავტორის 9 ფოტო იყო წარმოდგენილი. აქედან სპეციალურად მიწვეულმა ჟიურიმ სამი ფოტო შეარჩია. პირველ ადგილზე გასული ფოტოს ავტორს, მუნიციპალიტეტის გამგეობისგან ციფრული ფოტოაპარატი გადაეცა, მეორე და მესამე ადგილზე გასულებს კი სამახსოვრო სუვენირები.

გამგეობამ კონკურსი, დაახლოებით, ერთი თვის წინ, მუნიციპალიტეტის მასშტაბით გამოაცხადა. მასში მონაწილეობა, ნებისმიერი ასაკის მსურველს შეეძლო.

„ფოტოკონკურსი გამგეობის „ფეისბუქ“ გვერდზე გვქონდა გამოცხადებული, ასევე, მუნიციპალიტეტის სოფლებში განცხადებები გამოვაკარით“– ამბობს ახალციხის მუნიციპალიტეტის გამგეობის კულტურის სამსახურის უფროსი მაია სხირტლაძე.

პირველ ადგილზე გასვლა და ციფრული აპარატის მოპოვება, ახალციხის მუნიციპალიტეტის სოფელ ზიკილიაში მცხოვრებმა მარიამ გაჩეჩილაძემ შეძლო. როგორც თვითონ ამბობს, გამარჯვებას არ ელოდა.

„ფოტოზე სოფელ ზიკილიის მოსახვევია ასახული. ეს მოსახვევი ცნობილი ავარიებით გახდა, ამიტომ მინდოდა, რომ ეს ადგილი სულ სხვა რაკურსით მეჩვენებინა საზოგადოებისთვის “– ამბობს პირველ ადგილზე გასული მარიამ გაჩეჩილაძე.

მეორე ადილზე სოფელ კლდეში მცხოვრები მარიამ წიქარიშვილი, მესამეზე კი სოფელ წყორძიდან ნიკა ასლანიძე გავიდა.

ახალციხის მუნიციპალიტეტის გამგეობის კულტურის სამსახურმა აღნიშნული ღონისძიების საჩუქრებისთვის 250 ლარი დახარჯა.



[ ვარლამ წიკლაური, ახალციხე]