ფოტოკონკურსი სამცხე–ჯავახეთში – 'ერთი ფოტოს ისტორია'

"ერთი ფოტოს ისტორია" – ასე ჰქვია ფოტოკონკურსს, რომელიც არასამთავრობო ორგანიზაცია "დემოკრატ მესხთა კავშირმა" 29 სექტემბერს გამოაცხადა.

ფოტოკონკურსში მონაწილეობის მიღება სამცხე–ჯავახეთში მცხოვრებ, 14–დან 25 წლამდე ასაკის ახალგაზრდებს შეუძლიათ. კონკურსი მონაწილეობის მიღების მსურველებმა უნდა გადაიღონ ფოტო, რომლის საშუალებითაც გადმოსცემენ მათი ქალაქის, თემის, სოფლის და მასში მცხოვრები ადამიანების ისტორიას, წეს–ჩვეულებებს.

ფოტოს გადაღება შესაძლებელია, როგორც ფოტო–აპარატით, ასევე მობილური ტელეფონით. სურათს კი თან უნდა დაურთონ მოკლე აღწერა.

საბოლოოდ სამი გამარჯვებული გამოვლინდება, აქედან ორს წინასწარ შექმნილი ჯგუფი შეარჩევს, ხოლო ერთი სურათი გამოვლინდება "დემოკრატ მესხთა კავშირის" Facebook გვერდზე დაგროვებული ‪‎LIKE‬-ის მიხედვით.

ფოტო სურათის გაგზავნა შესაძლებელია facebook გვერდზე (პირადი შეტყობინების სახით) ან "დემოკრატ მესხთან კავშირის" ოფისში.

[თამარ თოთაძე, ახალციხე]