ახალციხეში ორი ავტომანქანა ერთმანეთს შეეჯახა

ავტოავარია ახალციხეში დღეს, 4 მარტს, დაახლოებით 18:30 საათზე მოხდა. ორი ავტომობილი ერთმანეთს 9 აპრილის ქუჩაზე, მაღაზია „VIP”-ის მიმდებარე ტერიტორიაზე შეეჯახა. შემთხვევას მსხვერპლი არ მოჰყოლია, თუმცა არიან დაშავებულები.

ადგილზე გამოძახებული იყო სასწრაფო სამედიცინო დახმარება, როგორც საზოგადოებასთან ურთიერთობის სამსახურის წარმომადგენელი ამბობს – "ავტოავარიის შესახებ სასწრაფოში ზარი 18:37 წუთზე დაფიქსირდა. ადგილზე მისულ ეკიპაჟს სამი დაშავებული დახვდა, საშუალო და მსუბუქი დაზიანებებით. სამივე მათგანი გადაყვანილია სამედიცინო დაწესებულებაში."

დაშავებულები სამედიცინო შემოწმებას კლინიკა "იმედში" გადიან. "მათგან ერთი მცირეწლოვანია, უფრო მეტად დაშავდა. დანარჩენ ორ მგზავრს კი უმნიშვნელო დაზიანებები აღენიშნება" – აცხადებენ კლინიკა „იმედში“.

შსს–ს საზოგადოებასთან ურთიერთობის სამსახურის ინფორმაციით, მომხდარზე ძიება სისხლის სამართლის კოდექსის 276–ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების, ან ექსპლუატაციის წესის დარღვევას გულისხმობს.

[sknews.ge]