ბორჯომში ერთმანეთს ‘მაგთის’ მინივენი და სატყეოს ჯიპი შეეჯახა

ტელეკომპანია "ბორჯომის" ფოტო

ავტოსაგზაო შემთხვევა დღეს, 17 მარტს, მოხდა. ტელეკომპანია "ბორჯომის" ინფორმაციით, ერთმანეთს "HYUNDAI"-ს მარკის მინივენი და SUZUKI"-ს მარკის ჯიპი შეეჯახა. მინივენი სავარაუდოდ კომპანია "მაგთიკომს" ეკუთვნის და ის თბილისის მიმართულებით მოძრაობდა, ჯიპი კი სამცხე–ჯავახეთის სატყეო სამსახურის კუთვნილებაა და ის ახალციხის მიმართულებით მოძრაობდა.

ეროვნული სატყეო სააგენტოს საზოგადოებასთან ურთიერთობის სამსახურში ადასტურებენ, რომ მანქანა მათ ეკუთვნოოდათ: "ბორჯომ–ბაკურიანის სატყეო სამსახურის მანქანაა, ერთი თანამშრომელი იყო მანქანაში, სამსახურებრივ მოვალეობას ასრულებდა, შემოვლაზე იყო. საპირისპიროდ მოძრავი მანქანა მოცურდა და შეეჯახა. ჩვენს თანამშრომელს ალკოჰოლზე ტესტი ჩაუტარდა და დადასტურდა, რომ ფხიზელია. დანარჩენს გამოძიება დაადგენს".

სასწრაფო – სამედიცინო დახმარების სამსახურის ინფორმაციით, შემთხვევის ადგილზე მისულ სასწრაფო დახმარების ბრიგადას ადგილზე 4 მამაკაცი დახვდა, 4–ვე მათგანს მსუბუქი დაზიანებები აღენიშნებოდა.

"ერთ–ერთ მამაკაცს ზედა კიდურის ზედაპირული ტრამვა ჰქონდა და ადგილზე ჩაუტარდა პირველადი სამედიცინო დახმარება. სამედიცინო დაწესებულებაში გადაყვანა არცერთს არ დასჭირდა", – განაცხადა "სამხრეთის კარიბჭესთან" საუბარში სასწრაფო – სამედიცინო დახმარების სამსახურის საზოგადოებასთან ურთიერთობის სამსახურის წარმომადგენელმა.

[sknews.ge]