205 000 ლარი რეგიონული რაგბის კლუბისთვის

რეგიონის შვიდი მუნიციპალიტეტიდან, „ტაოსთვის“ ყველაზე მეტი ბორჯომის თვითმმართველობამ გამოყო, ყველაზე ნაკლები კი ნინოწმინდამ.

ქალაქი ახალციხე – 30 000 ლარი;
ახალციხის თემი – 30 000 ლარი;
ასპინძა – 47 000 ლარი;
ადიგენი – 28 000 ლარი;
ნინოწმინდა – 20 000 ლარი;
ბორჯომი – 50 000 ლარი;

ყველა მათგანმა თანხა წლის დასაწყისში გაწერა. ახალქალაქში კი ჯერ ახლა ფიქრობენ.

„ჯერ თანხა გათვალიწინებული არ გვაქვს, თუმცა, ვფიქრობთ, რომ გამოვყოთ“, – განაცხადა ახალქალაქის მუნციპალიტეტის საკრებულოს თავმჯდომარემ ჰამლეტ მოვსესიანმა.

მიუხედავად იმისა, რომ რაბის კლუბს მთელი რეგიონი ინახავს და მისი ჯამური დაფინანსება, 205 000 ლარს აღწევს, „ტაოს“ პრეზიდენტი ირაკლი გვენეტაძე ამბობს, რომ ეს თანხა კლუბის არსებობისთვის საკმარისი არ არის: „ალბათ დაგვჭირდება დაფინანსება. მოლაპარაკებები მიდის მუნიციპალუტეტებთან და თანახმა არიან თანხა დაგვიმატონ. თანხის ოდენობა თვის ბოლოს გაირკვევა“.

მისივე თქმით, „ტაო“ აქტიურად ვარჯიშობს და ემზადება საქართველოს ჩემპიონატში მონაწილეობის მისაღებად: „კლუბი მიიღებს მონაწილეობას საქართველოს ჩემპიონატის მეორე ლიგაში. შევქმენით ბავშვთა გუნდიც, რომელიც ასევე მიიღებს მონაწილეობას ჩემპიონატის „ბ“ ლიგაში“.

კლუბის წევრები აქტიურ ვარჯიშს ახალციხეში გადიან, თუმცა როგორც „ტაოს“ ადმინისტრაციაში განმარტეს, თამაშების წინ, ორი დღით ადრე, სპორტსმენები ასპინძის სარაგბო ბაზაზე ივარჯიშებენ: „ჩვენს მიერ გამოცხადებულ ტენდერში ასპინძის ბაზამ გაიმარჯვა“.
შეგახსენებთ, რომ კლუბი „ტაო“ გასული წლის მარტში ჩამოყალიბდა. ეს პირველი კლუბია, რომელიც მუნიციპალიტეტებისგან ფინანსდება.



[თინათინ ზაზაძე, ახალციხე]