სარაგბო კლუბი ‘ტაო’ პირველ ლიგაში პირველ თამაშს გამართავს

შეხვედრა 14:00 საათზე, ასპინძის სარაგბო ბაზაზე გაიმართება. მეორე ლიგაში გამარჯვების შემდეგ „ტაო“ უკვე პირველი ლიგის შეჯიბრებებში ერთვება.

პირველ ლიგაში რვა გუნდი იღებს მონაწილეობას. მატჩები შაბათს, ექვს ოქტომბერს დაიწყება და დიდ 10–ში ასასვლელი ფინალური თამაშები 2019 წლის 20–21 აპრილს ჩატარდება.

როგორც სამცხე–ჯავახეთის სარაგბო კლუბ „ტაოს“ პრეზიდენტი ირაკლი გვენეტაძე ამბობს, ქუთაისის „ბაგრატი“ ძლიერი გუნდია: „ბაგრატი“ უმაღლესი ლიგიდან გამოვარდა, მაგრამ ძალიან გამოცდილი გუნდია“.

მისივე თქმით, „ტაოს“ ბოლო დროს ოთხი ძირითადი მოთამაშე გამოაკლდა: „ჩვენი გუნდიდან სამი ძირითადი მოთამაშე უმაღლეს ლიგაში გადავიდა, ხოლო ერთმა ჯანმრთელობასთან დაკავშირებული პრობლემების გამო დაგვტოვა. ვნახოთ როგორი თამაში გვექნება“.

„ტაოს“ შემდეგი თამაში, 13–14 ოქტომბერს, თბილისის გუნდ „იუნკერებთან“ ექნებათ.

[მარიამ ბარძიმაძე, ახალციხე]