სამცხე–ჯავახეთის თვითმმართველობები ‘ტაოს’ დაფინანსებას უზრდიან

ახალციხის მუნიციპალიტეტის მერიამ 2019 წლის ბიუჯეტის პროექტში რაგბის გუნდისთვის 90 000 ლარი განსაზღვრა.

„2018 წელს 70 000 ლარით ვაფინანსებდით, მომავალ წელს 90 000 ლარი იქნება. ხელშეწყობა სჭირდებათ. ბიჭებმა იმდენი გააკეთეს, რომ პირველ ლიგაში გადავიდნენ და ხომ არ მივატოვებთ?! პირველი ლიგაში ყოფნა ეს იმას ნიშნავს, რომ ფაქტობრივად სახელმწიფოს ჩემპიონატის მონაწილე გუნდი ხარ. იმედი გვაქვს, რომ ა კლასად იქცევიან“, – ამბობს ახალციხის მერის მოადგილე გურამ მელიქიძე.

„ტაოს“ ადიგენის მუნიციპალიტეტმა 2018 წელს 40 000 ლარი გადაურიცხა, 2019 წლისთვის კი გუნდისთვის 65 000 ლარს დახარჯავს.
„ძალიან დიდი პროგრესი აქვთ, ამიტომ ვფიქრობ, რომ მეტად უნდა შევუწყოთ ხელი. თან რეგიონის მასშტაბით ამ გუნდში ყველაზე მეტი სპორტსმენი ადიგენიდან თამაშობს“, – ამბობს ადიგენის მუნიციპალიტეტის მერი ზაქარია ენდელაძე.

იგივე მოტივით გაზარდეს დაფინანსება ასპინძის, ნინოწმინდის და ახალქალაქის მუნიციპალიტეტებმა.

ასპინძამ „ტაოს“ 2018 წელს 47 000 ლარი გამოუყო, 2019 წლისთვის კი 60 000 გაწერა. ნინოწმინდის მერიამ 2018 წელს 20 000 ლარი დაურიცხა, 2019 წელს კი 35 000 ლარს დაურიცხავს. ახალქალაქს 2018 წელს 40 000 ლარი ჰქონდა განსაზღვრული, 2019 წლისთვის კი 55 000 ლარი გაითვალისწინა.

რეგიონის ექვსი მუნიციპალიტეტიდან „ტაოს“ დაფინანსება მხოლოდ ბორჯომმა შეუმცირა. 2018 წელს კლუბი 75 000 ლარს იღებდა, 2019 წელს კი ბორჯომიდან 50 000 ლარი დაერიცხება.

მიმდინარე წელს „ტაომ“ მუნიციპალიტეტებიდან სულ 292 000 ლარი მიიღო.

სამცხე–ჯავახეთის სარაგბო კლუბ „ტაოს“ პრეზიდენტის ირაკლი გვენეტაძის განმარტებით აღნიშნული თანხის უმეტესი ნაწილი ხელფასებზეა გაწერილი. მისი თქმით, მომავალი წლიდან სპორტსმენების ხელფასები 300–დან 500–ლარამდე გაიზრდება. ამ დროისთვის მათი ხელფასების ოდენობა 200 ლარით განისაზღვრება.

„რაც ვიბრძოლეთ იმის ადეკვატური დაფინანსება არ გვქონდა. ჩვენ შედეგს ვაჩვენებთ და მერე ვითხოვთ თანხას. პირველი ლიგა პროფესიონალი ლიგაა და სხვა დაფინანსებაა საჭირო. მოთამაშეების რაოდენობა უნდა გავზარდოთ, რადგან ყველა გუნდი ძლიერია ვისაც ეთამაშები. თან ტურნირი, რომ დაამთავრო სრულყოფილად, მეტი ხელფასიანი მოთამაშე გვჭირდება. გარდა ამისა გვჭირდება ტრანსპორტის ხარჯები და ფორმების ყიდვა“, – ამბობს ირაკლი გვენეტაძე.

სამცხე–ჯავახეთის სარაგბო კლუბი„ტაო“ 2016 წლის ივნისში შეიქმნა.

„ორ წელიწადში პირველ ლიგაში ვართ, ეს დიდი შედეგია. მინდა გითხრათ, რომ დიდი ალბათობით შეიძლება მეოთხე ადილზე დავასრულოთ ეს წელიწადი სატურნირო ცხრილში, რაც თავისთავად ძალიან სერიოზული განაცხადია. ამსითვის კი შესაბამისი დაფინანსება გვჭირდება“, – აცხადებს გვენეტაძე.

შეგახსენებთ, რომ პირველ ლიგაში რვა გუნდი თამაშობს. გუნდმა „ტაომ“ შვიდი თამაში უკვე ითამაშა, აქედან სამი მოიგო და ოთხი წააგო. მეორე წრეში ამდენივე თამაშია ჩასატარებელი.

„დიდი იმედი გვაქვს, რომ მომავალ თამაშებს მოვიგებთ, რადგან ერთი სიძლიერის გუნდები ვართ, მაგრამ ჩვენ ცოტა უკეთესები, შესაბამისად დამერწმუნეთ, რომ ჩემპიონატს მეოთხე ადგილზე დავასრულებთ“.

[თინათინ ზაზაძე, ახალციხე]