‘ტაო’ – რაგბის პირველი გუნდი, მუნიციპალიტეტების მხარდაჭერით

კლუბი ახალციხის, ადიგენის, ბორჯომის, ასპინძისა და ნინოწმინდის მუნიციპალიტეტებმა დააფუძნეს. მუნიციპალიტეტების ნაწილმა ადგილობრივ ბიუჯეტებში რაგბის გუნდის არსებობისთვის თანხა უკვე გაწერა. თანხები 20.000–დან 25.000 ლარამდე მერყეობს.

ასპინძის სარაგბო ბაზაზე ჩამოყალიბებულ რაგბის რეგიონულ გუნდში ახალგაზრდებს რეგიონის შვიდივე მუნიციპალიტეტიდან შეკრებენ. თითო მუნიციპალიტეტიდან, რამდენი სპორტსმენი იქნება და რა ასაკობრივი კატეგორიის გუნდი ჩამოყალიბდება, ჯერ ცნობილი არ არის.

„კლუბის დაფუძნების მიზანია სამცხე-ჯავახეთის რეგიონში რაგბის ახალ საფეხურზე აყვანა და პოპულარიზაცია. უმნიშნელოვანესია, რომ ამ კლუბის დაარსებით საქართველოში საფუძველი ეყრება ახალ ტრადიციას, ვინაიდან რეგიონალური კლუბი ადგილობრივი ბიუჯეტიდან იქნება მხარდაჭერილი დამფუძნებელი მუნიციპალიტეტების მიერ“, – განაცხადა ‘ტაოს’ პრეზიდენტმა ირაკლი გვენეტაძემ.

უკვე შერჩეულია გუნდის ლოგო და რაგბისტების ფორმა.

‘ტაო’ უკვე წელს აპირებს საქართველოს პირველობაში ჩართვას, რომელსაც მე-2, იგივე კაცთა ‘რეგიონალური ლიგის’ 2016-2017 წლის სეზონით დაიწყებს.

რაგბის გუნდი ოფიციალურად და საზეიმოდ ასპინძაში, დღეს, 12 მაისს დაფუძნდა. ღონისძება ახალციხის, ასპინძისა და ადიგენის ბავშვთა გუნდების სარაგბო ფესტივალით დაიწყო და რეგიონალურ კლუბ „ტაოს“ წარდგენით გაგრძელდა.

ღონისძიებას სამცხე-ჯავახეთის გუბერნატორი, ახალციხის მერი, ახალციხის ადიგენის, ბორჯომის, ნინოწმინდისა და ასპინძის გამგებლები დაესწრნენ.



[თინათინ ზაზაძე, ახალციხე]