30 000 ლარი ბორჯომელი ფეხბურთელების წასახალისებლად

"თორის" დაფინანსების შესახებ, ბორჯომის საკრებულომ გადაწყვეტილება 26 ივლისის სხდომაზე მიიღო. თავმჯდომარის, გიორგი გოგიჩაიშვილის განმარტებით, თანხა რომელიც კლუბს ფეხბურთელების წასახალისებლად გადასცეს, მერიის შენობის რეაბილიტაციისთვის იყო განკუთვნილი, თუმცა პროექტი ჩაიშალა.

"არსებული შენობის რეაბილიტაციის გამო, მერია სხვა შენობაში უნდა გადასულიყო, თუმცა ალტერნატიული ფართი ვერ ვნახეთ, ამიტომ ეს პროექტი არ შედგა. სპორტსკოლის დირექტორი კი შემოსული იყო განაცხადით, რომ კლუბი "თორი" წაგვეხალისებინა. გუნდში ყველა ბორჯომელია და გადავწყვიტეთ თანხა მიგვეცა", - ასე განმარტავს საკრებულოს თავმჯდომარე კლუბისთვის თანხის გადაცემის მიზეზს.

ბორჯომის თორი რეგიონული ლიგის ქვედა აღმოსავლეთ ლიგის "ბ" ჯგუფში ასპარეზობს. გუნდმა ოთხ მატჩში ოთხივე მოიგო და პირველ ადგილზეა, თუმცა იმ შემთხვევაშიც კი, თუ გათამაშებას პირველ ადგილზე დაასრულებს, გუნდი ზედა ლიგაში მაინც ვერ გადავა.

შანსის არარსებობას საფეხბურთო კლუბ "თორის" მთავარი მწვრთნელიც ადასტურებს: "მიღებულ 30 ათას ლარს პრემიის სახით ფეხბურთელებზე გავცემთ, მათ ხელფასები არ აქვთ. ჩვენი მიზანია, წელს პირველ ადგილზე გავიდეთ და ძირითადი გუნდი შევინარჩუნოთ. წელს ვერა, მაგრამ ვეცდებით მომდევნო წელს "ლიგა 4"-ში გადავიდეთ", - გვითხრა ვასილ ფირცხალავამ.

[ავთო ინასარიძე, ბორჯომი]