„ტაო“ პირველ ლიგაში ასპარეზობისთვის ემზადება

„ტაოს“ მორაგბეები რეგიონ ლიგის 2017–2018 წლების სეზონის გამარჯვებულები გახდნენ და საქართველოს „დიდ ათეულს“, უმაღლეს ლიგას, კიდევ ერთი ნაბიჯით მიუახლოვდნენ. იმ შემთხვევაში, თუ შედეგს გაიმეორებენ, მესხი მორაგბეები რაგბის უმაღლეს ლიგაში, „დიდ ათეულში“ მოხვდებიან.

„ორ წელიწადზე მეტია, რაც ჩვენი კლუბი არსებობს, ამ ხნის მანძილზე მივაღწიეთ იმას, რომ გუნდი პირველ ლიგაში აღზევებულიყო. პირველ ლიგაში საკმაოდ ძლიერი გუნდები მონაწილეობენ, მათ შორის ჩვენ ყველაზე ახალგაზრდა გუნდი ვართ. ჩვენი მინიმალური მიზანი წელს ჩემპიონატში დარჩენა იქნება. პროგრამა მაქსიმუმი კი მესამე-მეოთხე ადგილზე მოხვედრაა”, - ამბობს სარაგბო კლუბ ტაოს პრეზიდენტი, ირაკლი გვენეტაძე.

გუნდს ახალი სეზონის დაწყებამდე ოთხი ახალი მორაგბე შეუერთდა, სამმა სპორტსმენმა კი „ტაო“ დატოვა.

სერგო ყურაშვილი გუნდის ერთ-ერთი ახალწვეულია, მორაგბემ რადიო „სამხრეთის კარიბჭეს“ გადაცემა „ავანგარდში“ გუნდის სამომავლო მიზნებზე ისაუბრა: „ტაოში ნამდვილი მეგობრული გარემოა, ეს კი რაგბში ძალიან მნიშვნელოვანია. აქამდე თბილისში ვთამაშობდი, ახლა კი ასპინძის ბაზაზე ვიცხოვრებ და გუნდთან ერთად ვეცდები „ტაოს“ წარმატებას“, - ამბობს გუნდის ახალწვეული.

სარაგბო გუნდი ახალ სეზონს 6 ან 7 ოქტომბერს, საშინაო მატჩში ქუთაისის “ბაგრატთან“ დაპირისპირებით დაიწყებს.

[ავთო ინასარიძე, ახალციხე]