მე-5 სკოლაში გალახული მოსწავლეების ამბის გახმაურების შემდეგ, სკოლებში ფსიქოლოგის აუცილებლობაზე ალაპარაკდნენ

ახალციხელი ინგა ბანკანაშვილი, რომელიც ერთი შვილის დედაა, ამბობს, რომ კონკრეტული ფაქტიდან გამომდინარე [ჟენია მერაბიშვილის მიერ მოსწავლეების დასჯა] საინტერესოა არა ის, თუ როგორ დაისჯება დამნაშავე, არამედ ის, თუ როგორ დასკვნებს გააკეთებს საზოგადოება.

- ”მოზარდს იმიტომ ჰქვია მოზარდი, რომ არაა ზრდასრული ადამიანი და ყოველთვის შეიძლება შეეშალოს რაღაც. მაგრამ ეს არ გვაძლევს იმის უფლებას, რომ შეცდომაზე მივუთოთ უფრო დიდი შეცდომის ჩადენით, - ამბობს ბანკანაშვილი და ამატებს, რომ მომხდარმა სკოლებში ფსიქოლოგის საჭიროება კიდევ უფრო მეტად დაანახა. ასევე დაარწმუნა იმაში, რომ საგანმანთლებლო დაწესებულებებში მანდატურის სამსახური ზედმეტია, - ძალისმიერი მეთოდები და დასმენები მანდატურების სკოლაში შეშვების შემდეგ უფრო გაძლიერდა”.

”დემოკრატ მესხთა კავშირის” წარმომადგენელის გია ანდღულაძის თქმით, თუ მანდატურის სამსახურს დარღვევის ფაქტები აქვს, მათზე რეაგირება სამინისტროსა და სხვა შესაბამისი სამსახურების პრეროგატივაა. რაც შეეხება სკოლებში ფსიქოლოგების დანიშვნას, ამბობს, რომ მომხდარსა და ფსიქოლოგს შორის კავშირს ვერ ხედავს: ”ფსიქოლოგი სკოლასთან რა კავშირშია?! რაც თქვენ სტატიაში წავიკითხე, ვფიქრობ, რომ იქ ფსიქოლოგის საჭიროება არ დგას”.

პირიქით ფიქრობს ახალციხის საზოგადოებრივი განვითარების ცენტრის ხელმძღვანელი ნუგზარ თათეშვილი და ამბობს, რომ სკოლებში ფსიქოლოგების არსებობა აუცილებელია: ”განათების სისტემას რეფორმა სჭირდება, გარდა ფსიქოლოგებისა სკოლებში უნდა გვყავდეს ნამდვილი პედაგოგებიც, რომლებიც მხოლოდ საგნის სპეციალისტები კი არ იქნებიან, ეცოდნიებათ ბავშვებთან მიდგომაც”.

ასოციაცია ”ტოლერანტის” თავმჯდომარის ცირა მესხიშვილის თქმით, თუ ნამდვილად იციან მშობლებმა, რომ სკოლაში ძალადობას აქვს ადგილი და ხმას არ იღებენ, ეს მათი ცნობიერების დაბალ დონეზე მეტყველებს: ”ვინც დანაშაულს ჩაიდენს მცირეს თუ დიდს, ყველამ უნდა აგოს პასუხი”.