ახალქალაქის სკოლებში ოთხ მანდატურს დაამატებენ

მანდატურის კონკურსში მონაწილეობისთვის განაცხადის შეტანის ვადა ოთხ სექტემბერს ამოიწურა. კანდიდატებმა გასაუბრების ეტაპი უკვე გაიარეს და ფიზიკური მზაობის შემოწმებას გადიან.

ის კონკურსანტი, რომელიც ყველა ეტაპს წარმატებით გადალახავს, ორთვიან კურსს შინაგან საქმეთა სამინისტროს აკადემიაში გაივლის.

„ფიზიკური მზაობის კომპონენტის შემოწმება დარჩა, რის შემდეგაც გვეცოდინება ჩააბარებენ თუ არა, შემდეგ გაიგზავნებიან შსს-ს აკადემიაში, ორთვიან მოსამზადებელ კურსზე. თუ აკადემიასაც დაასრულებენ წარმატებით, შემდეგ გვეცოდინება, ნამდვილად იწყებენ მუშაობას თუ არა“, - განმარტავენ მანდატურის სამსახურში.

მათივე თქმით, სამსახური სკოლებში მანდატურების დამატებას სამცხე-ჯავახეთის მასშტაბით გეგმავს, ამისთვის კი ვაკანსიები პერიოდულად ცხადდება.

მიმდინარე წელს მანდატურების დამატება იგეგმება ახალქალაქის, ილია ჭავჭავაძის სახელობის N3 საჯარო სკოლაში.

მანდატურობის კანდიდატებმა, რომლებიც წარმატებით გაივლიან მოსამზადებელ კურსებს, დანიშვნამდე უნდა წარმოადგინონ შემდეგი დოკუმენტაცია:

▶რეზიუმე;
▶2 ფოტოსურათი, ასევე დისკზე ჩაწერილი;
▶პირადობის დამადასტურებელი დოკუმენტის ასლი;
▶განათლების დამადასტურებელი დოკუმენტის ასლი;
▶ცნობა ლევან სამხარაულის სახელობის სასამართლო ექსპერტიზის ეროვნული ბიუროდან ნარკოლოგიური აღრიცხვიანობისა და სამედიცინო-ნარკოლოგიური შემოწმების შესახებ.

[თაკო ფეიქრიშვილი, ახალქალაქი]