მზადება განმეორებითი იმპიჩმენტისთვის ადიგენში

იმპიჩმენტის წესით გადაყენებული და სასამართლოს ძალით დაბრუნებული ლევან ლობჯანიძე, საკრებულოში მუშაობას გუშინ, 7 თებერვალს შეუდგა. დღეს კი საკრებულოში მისი გადაყენების მოთხოვნით განცხადება შევიდა.

„განცხადება უკვე გამზადებული ჰქონდათ და შემოაგდეს. სამსახურში არცერთი დეპუტატი არ არის მოსული“,– განაცხადა ლევან ლობჯანიძემ.

მისივე თქმით, როდის ჩანიშნავს რიგგარეშე სხდომას, ჯერ გადაწყვეტილი არ აქვს: „არ ვიცი როდის ჩავატარებთ ხდომას, ახლა ისეთ მდგომარეობაში ვარ“.

როგორც ადგილობრივ თვითმმართველობაში აცხადებენ, საკრებულოს თავმჯდომარის იმპიჩმენტის წესით გადაყენებისთვის 10 დეპუტატის თანხმობაც საკმარისია. საკრებულოში სულ 30 დეპუტატია, განცხადებას კი ხელს 13 დეპუტატი აწერს.

„ისევ სამართლებრივად ვიბრძოლებ, როგორ შეიძლება, ერთი დღეა რაც დავინიშნე“, – აცხადებს ლევან ლობჯანიძე.

ლევან ლობჯანიძე ადიგენის საკრებულოს თავმჯდომარეობიდან, პირველად, 2015 წლის 4 მარტს, იმპიჩმენტის წესით გადააყენებს, –17 ხმით 10–ის წინააღმდეგ. ლობჯანიძემ გადაყენება უკანონოდ მიიჩნია, სასამართლოს გზით იბრძოლა და სამივე ინსტანცია მოიგო.

უზენაესი სასამართლოს გადაწყვეტილების თანახმად, საკრებულო ვალდებული იყო ყოფილი თავმჯდომარე პოზიციაზე აღედგინა და მისთვის 23 თვის იძულებით განაცდური აენაზღაურებინა, რაც 60, 950 ლარს შეადგენს.

საკრებულომ ლობჯანიძე პოზიციაზე გუშინ, 7 თებერვლის სხდომაზე აღადგინა.

[თინათინ ზაზაძე, ადიგენი]