დაბრუნება იმპიჩმენტიდან 2 წლის შემდეგ და კვლავ იმპიჩმენტის მოლოდინი [Video]

ადიგენის საკრებულომ იმპიჩმენტის წესით გადაყენებული თავმჯდომარის, ლევან ლობჯანიძის, დაბრუნების საკითხი ცნობად მიიღო. ამ განცხადებისთანავე, საკრებულოს თავმჯდომარემ მოადგილემ და უმრავლესობის რამდენიმე დეპუტატმა სხდომათა დარბაზი ისე დატოვეს, რომ არც ლობჯანიძეს მიეცა რაიმეს თქმის საშუალება და ვერც საკრებულოს სხვა წევრებმა მოასწრეს კითხვების დასმა.


საკრებულოს სხდომა ადიგენში. 7 თებერვალი, 2017წ.

ამ დრომდე უცნობი რჩება, როდის შეუდგება ლობჯანიძე მოვალეობის შესრულებას და როდის მიიღებს იძულებით განაცდურს – 60 950 ლარს. ამ ეტაპზე ასევე ღიად რჩება საკითხი, დარჩება ლობჯანიძე ამ პოზიციაზე თუ ისევ იმპიჩმენტს მოუწყობენ. ლობჯანიძე ამბობს, რომ ასეთ შემთხვევაში კვლავ სასამართლოს მიმართავს.

შეგახსენებთ, რომ ლევან ლობჯანიძე 2015 წლის 4 მარტს, საკრებულოს სხდომაზე, 17 ხმით 10–ის წინააღმდეგ, დეპუტატებმა ფარული კენჭისყრით თანამდებობიდან გადააყენეს. ლობჯანიძე ადგილობრივ თვითმმართველობას უკანონოდ გათავისუფლებაში ადანაშაულებდა. მან საქმე სამივე ინსტანციაში მოიგო. უზენაესი სასამართლოს გადაწყვეტილების მიხედვით, საკრებულო ვალდებულია. ყოფილი თავმჯდომარე პოზიციაზე აღადგინოს და 23 თვის იძულებით განაცდური აუნაზღაუროს., რაც 60, 950 ლარს შეადგენს.


ლევან ლობჯანიძე

[თამუნა უჩიძე, ოთარ აწყურელი, ადიგენი]