ენმ–მ მესხეთში კანდიდატები შეარჩია

მთავარი → სიახლე, პოლიტიკა, არჩევნები, საზოგადოება 12.08.2017

ენმ–ს მერობის კანდიდატები მესხეთში ცნობილია. ვინ იბრძოლებს პარტიის სახელით ჯავახეთში ჯერ გადაწყვეტილი არ არის.

„ერთიანმა ნაციონალურმა მოძრაობამ“ ადიგენში, ბორჯომსა და ასპინძაში 2017 წლის თვითმმართველობის არჩევნებისთვის მერობის კანდიდატები შეარჩია.

პარტიის სახელით ბორჯომში ვალერი გრიგალაშვილი იბრძოლებს. გრიგალაშვილი წლების განმავლობაში პროკურატურაში პროკურორად მუშაობდა. ბოლოს იგი საადვოკატო საქმიანობას ეწეოდა.

ადიგენში „ერთიანი ნაციონალური მოძრაობის“ მერობის კანდიდატი რატი ტატალაშვილი იქნება. იგი ადიგენის მუნიციპალიტეტის საკრებულოში ფრაქცია „ქრისტიან კონსერვატორების“ თავმჯდომარეა. მანამდე მას ადიგენის მუნიციპალიტეტის გამგებლის მოადგილის პოზიცია ეკავა.

ასპინძაში „ნაციონალური მოძრაობიდან“ მერობისთვის ხმების მოპოვებას მალხაზ მოსიძე ეცდება. იგი ასპინძის მუნიციპალიტეტის საკრებულოში ფრაქცია „ნაციონალური მოძრაობის“ თავმჯდომარეა. დეპუტატობამდე მოსიძე გამგეობაში სხვადასხვა დროს სხვადასხვა პოზიციებზე მუშაობდა.

რაც შეეხება ახალციხეს, აქ მერობის კანდიდარი ირაკლი ბარძიმაძეა. იგი წლების განმავლობაში ისევე როგორც გრიგალაშვილი, პროკურატურაში პროკურორი იყო, ამჟამად კი საადვოკატო საქმიანობითაა დაკავებული.

პარტია კანდიდატებს, ხვალ 13 აგვისტოს ახალციხეში წარადგენს.

[თამუნა უჩიძე, ახალციხე]