ახალციხის თემის საკრებულოში ფრაქცია ‘ნაციონალების’ ხელმძღვანელი შეიცვალა

ფრაქციის უკვე ყოფილმა ხელმძღვანელმა, ტარიელ ტაბატაძემ, ახალციხის თემის საკრებულოს იურიდიულ საკითხთა კომისიას ფრაქციის დატოვების მოთხოვნით 5 სექტემბერს მიმართა.

„ფრაქციას 4 თვის განმავლობაში ვხელმძღვანელობდი, მივიღე გადაწყვეტილება, პარტიაც დავტოვე და ფრაქციაც“, – განაცხადა საკრებულოს სხდომაზე ტარიელ ტაბატაძემ.

დღეიდან აღნიშნულ ფრაქციას კობა სანდროშვილი უხელმძღვანელებს. აღნიშნული ინფორმაცია საკრებულოს დეპუტატებმა დღეს, 29 სექტემბერს, საკრებულოს სხდომაზე, ცნობად მიიღეს.

„იცით, რომ ტარიელი „ევროპულ საქართველოში“ გადავიდა, ეს გადაწყვეტილება გახდა საფუძველი, რომ დატოვებინა ფრაქცია „ნაციონალური მოძრაობა“. ტარიელი ანდრიაწმინდის მაჟორიტარულ ოლქში იყრის კენჭს „ევროპული საქართველოდან“, – განაცხადა კობა სანდროშვილმა.

შეგახსენებთ, რომ მიმდინარე წლის 10 მარტს „ერთიანი ნაციონალური მოძრაობის“ ორად გაყოფის შემდეგ ახალციხის მუნიციპალიტეტის საკრებულოში ფრაქციები „საქართველოს ქრისტიან კონსერვატიული პარტია“ და „ერთიანი ნაციონალური მოძრაობა“ დაიშალა. დეპუტატებმა, რომლებიც აღნიშნულ ფრაქციებში იყვნენ, ორ ახალშექმნილ ფრაქციაში გადანაწილდნენ, ესენია: „მოძრაობა თავისუფლებისთვის – ევროპული საქართველო“ და „ერთიანი ნაციონალური მოძრაობა“.

„მოძრაობა თავისუფლებისთვის – ევრპულ საქართველოს“ ირინა გელაშვილი ხელმძღვანელობს, რომლის წევრები არიან: მარინა სუდაძე, კახაბერ მოდებაძე და რობერტ მურადიანი.

რაც შეეხება ფრაქცია„ნაციონალურ მოძრაობას“, მას 5 სექტემბრამდე ტარიელ ტაბატაძე ხელმძღვანელობდა . ფრაქცია ამირან ბუხრიკიძეს, გიორგი ბლიაძესა და კობა სანდროშვილს აერთიანებდა.

[თინათინ ზაზაძე, ახალციხე]