ახალციხის 5 სოფელში ხილის საშრობებს მოაწყობენ

ახალციხის სოფლებში, – ჭაჭარაქი, მინაძე, ურაველი, მუსხი და წყორძა, მალე ხილის საშრობები მოეწყობა, აქ დამზადებული ჩირი კი ადგილობრივ ბაზარზე გაიყიდება.

ხილის საშრობები პროექტის, „სოციალური მეწარმეობა და განახლებადი ენერგიები“ ფარგლებში კეთდება. პროექტს, რომლის ბიუჯეტი, 13 173 ლარია, ორგანიზაცია „მეგზური“ ახორციელებს.

პროექტის ხელმძღვანელების თქმით, საშრობის მასალას ორგანიზაცია შეიძენს, მის დამონტაჟებას კი ენერგოეფექტურობის თემაზე მომუშავე, საზოგადოებრივი განვითარების ახალციხის ცენტრის დირექტორი ნუგზარ თათეშვილი უზრუნველყოფს.
თითო სოფელში სამ ოჯახს შეარჩევენ, ჯამში, საშრობი, 15 ოჯახს ექნება. როგორც ორგანიზაციაში აცხადებენ, შეარჩევენ ნაკლებად შეძლებულ ოჯახებს, რომელთაც ხილი მოჰყავთ.

„ერთად ავაწყობთ და შევასწავლით ტექნოლოგიებს“, – ამბობს არასამთავრობო ორგანიზაცია „მეგზურის“ თავმჯდომარე მეგი ბერიძე.
მისი თქმით, პროექტი ექვსთვიანია და მისი მიზანი სოციალური მეწარმეობის ხელშეწყობაა.

პროექტის პრეზენტაცია დღეს, 7 თებერვალს, ახალციხის დემოკრატიული ჩართულობის ცენტრში შედგა. პროექტი ევროკავშირის დაფინანსებით ხორციელდება.

[მარიამ ბარძიმაძე, ახალციხე]