ახალციხის საზოგადოებრივი განვითარების ცენტრმა ახალი პროექტის პრეზენტაცია გამართა

შეხვედრას ადგილობრივი ხელისუფლების, არასამთავრობო ორგანიზაციებისა და მედიის წარმომადგენლები დაესწრნენ.

„უნდა ვიზრუნოთ მოსახლეობის ცნობიერების ამაღლებაზე. გვექნება პრაქტიკული ტრენინგები, სადაც დავამზადებინებთ მზის კოლექტორებს, ხილის საშრობებს, გავაკეთებინებთ შენობების თბოიზოლაციას. უნდა ვიზრუნოთ, რომ ტყეზე მოთხოვნა შემცირდეს“, – ამბობს პროექტის ხელმძღვანელი ნუგზარ თათეშვილი.

პროექტს „საზღვრისპირა თანამშრომლობის გზით სატყეო და ენერგეტიკული მდგრადი განვითარება“ საზოგადოების განვითარების ახალციხის ცენტრი ევროკავშირის დაფინანსებით ახორციელებს. პროექტის პარტნიორები არიან ლორეს ეკო კლუბი (სომხეთი) და საქართველოს ეკოლოგიურ მიწათმოქმედთა ასოციაციაა (SEMA). პროექტის დაფინანსება 91,395 ევროა. პროექტი 18 თვის განმავლობაში გაგრძელდება.

დღევანდელ შეხვედრაზე პროექტის „ენერგიის მდგრადი განვითარების ხელშეწყობა“ ფარგლებში გადამზადებულ ადგილობრივებს სერთიფიკატებიც გადაეცათ.

„37 მონაწილეს შევასწავლეთ კოლექტორების მშენებლობა და ქალბატონებს კი კოლექტორების მუშაობის მონიტორინგი. აღნიშნული პროექტი სამი წლის განმავლობაში გრძელდებოდა და ესეც ევროკავშირის დაფინანსებით ხორციელდებოდა“, – ამბობს ნუგზარ თათეშვილი.



[თნათინ ზაზაძე, ახალციხე]