'ახალგაზრდა ადვოკატების' საჯარო ლექცია ახალციხელი ახალგაზრდებისთვის

შეხვედრა არასამთავრობო ორგანიზაცია „ახალგაზრდა ადვოკატების“ პროექტის „ერთად ევროპული არჩევანისათვის“ ფარგლებში, ახალციხის დემოკრატიული ჩართულობის ცენტრში შედგა.

„საქართველოს ევროპული არჩევანი საპასუხისმგებლო, ისტორიული მომენტია. ამ პროცესში ახალგაზრდების ჩართულობა, ახალი საზოგადოებრივი თვითშეგნების, მართლწესრიგისა და სოციალური გარემოს შექმნისთვის. ერთ–ერთი განმსაზღვრელი ფაქტორია. სწორედ ამიტომ ხორციელდება ეს პროექტი“, – აცხადებენ ორგანიზაციაში.

„რამდენიმე დღის წინ ასოცირების ხელშეკრულებას მოეწერა ხელი. ვფიქრობ, რომ დღევანდელი შეხვედრა ძალიან მნიშვნელოვანია. მსგავსი შეხვედრებით ახალგაზრდებში ინფორმირებულობის დონე იზრდება“, – ამბობს შეხვედრის ერთ–ერთი მონაწილე ეკა გვარამაძე.

3 ივლისს საჯარო ლექცია მარნეულშია დაგეგმილი. ამის შემდეგ ორგანიზაცია გამოაცხადებს კონკურსს თემაზე: „საქართველო ევროკავშირის გზაზე“, რომელსაც 5 გამაარჯვებული ეყოლება. კონკურსში მონაწილეობის მსურველებს ნაშრომების გაგზავნა სექტემბრამდე შეუძლიათ. სექტემბერში დასკვნითი კონფერენცია გაიმართება, სადაც გამარჯვებულებს გამოავლენენ და დააჯილდოვებენ. დაგეგმილია გამარჯვებული კონკურსანტების ნაშრომების კრებულად გამოცემა.

არასამთავრობო როგანიზაცია „ახალგაზრდა ადვოკატები“, 2012 წელს დაფუძნდა. ორგანიზაცია პროექტს სსიპ „ბავშვთა და ახალგაზრდობის ფონდის“ საგრანტო პროექტის ფარგლებში ახორციელებს.

პროექტს მხარდაჭერას საქართველოს საგარეო საქმეთა სამინისტრო, განათლებისა და მეცნიერების სამინისტრო, ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატი, ნატოსა და ევროკავშირის შესახებ საინფრომაციო ცენტრი, საქართველოს პარლამენტის ევროპასთან ინტეგრაციის კომიტეტი, სამცხე–ჯავახეთისა და ქვემო ქართლის სახელმწიფო რწმუნებულის აპარატი, ახალციხისა და მარნეულის საკრებულოები და ადგილობრივი რესურსცენტრები უცხადებენ.

[თინათინ ზაზაძე, ახალციხე]