ახალციხეში ხილის საშრობები გააკეთეს

ორი წლის განმავლობაში, პროექტის „ქალები საუკეთესო მომავლისთვის“ ფარგლებში სამცხე–ჯავახეთში ქალებს ბიზნესის განვითარების გეგმაზე ტრენინგები უტარდებოდათ. მათ მიღებული ცოდნა პრაქტიკაში გამოიყენეს და ხილის საშრობი მოწყობილობები დაამზადეს.

„ჩვენ ვისწავლეთ თუ , როგორ უნდ გავაკეთოთ და გამოვიყენოთ ხილის საშრობი, როგორ გავახმოთ ხილი და როგორ მოვახდინოთ მისი რეალიზება“- ამბობს პროექტის მონაწილე მარეხი მელიქიძე.

ახალციხის ახალგაზრდული ცენტრის დირექტორის და პროექტის კოორდინატორის მაკა სუდაძის თქმით, ქალები ორი წლის განმავლობაში სწავლობდნენ თუ როგორ უნდა შეექმნათ მარტივი ტიპის საშრობები: „პროექტის მონაწილეებმა ტრენინგიდან მიღებული ცოდნა გამოიყენეს და სახლის პირობებში დაამზადეს ხილის საშრობები. ჩვენი მიზანია, ეს ადამიანები არ დავტოვოთ შუა გზაზე და დავაკავშიროთ სხვადასხვა ორგანიზაციებს, რომ მიღებულ ცოდნა პრაქტიკაში უკეთ გამოიყენონ“.

პროექტის ხელმძღვანელი ნუგზარ თათეშვილი ამბობს, რომ მუნიციპალიტეტის მასშტაბით ამ დროისთვის სულ 38 ხილის საშრობი შეიქმნა: „ქალებს თუ მეტ შესაძლებლობას მივცემთ ბიზნესში, ოჯახური ბიუჯეტი უფრო გაიზრდება. ვფიქრობ, მიზანს მივაღწიეთ“.

პროექტი ევრო კავშირის ფინანსური მხარდაჭერით განხორციელდა.

[ვარლამ წიკლაური, ახალციხე]