ახალციხეში არასასოფლო–სამეურნეო დანიშნულების მიწის ფასი გაორმაგდა

ახალციხის საკრებულომ ქალაქში არსებული ტერიტორია სამ ზონად დაყო, შესაბამისად ერთი კვადრატული მეტრი მიწის ნორმატიული ფასი ასე გადაანაწილა: ცენტრალური ზონა –14,04 ლარი; შუალედური ზონა– 10.80 ლარი; პერიფერიული ზონა –7.56 ლარი;
არასასოფოლო სამეურნეო მიწის ნორმატიულ ფასებს საკრებულო, მერიის მოთხოვნით, ყოველი წლის დასაწყისში ამტკიცებს.

საკრებულოს თავმჯდომარის დავით ლომიძის განცხადებით, ფასი სხვა მუნიციპალიტეტებთან შედარებით მაღალი არ არის, თუმცა ამბობს, რომ გასულ წელთან შედარებით გაორმაგებული ნამდვილადაა: „გასულ წელს ცენტრალური ზონა 7,04 ლარი იყო, ახლა 14,04 ლარია. ჩვენზე დიდი გადასახადები აქვთ სხვა მუნიციპალიტეტებს, ეს გამოიწვია ინფლაციამაც“.

ცენტრალური ზონად მდინარე ფოცხოვის მარჯვენა სანაპირო განისაზღვრა. საკრებულოს განმარტებითი ბარათის მიხედვით, უფრო ზუსტად აქ „ახალი ხიდიდან“ „ძველ ხიდამდე“ არსებული ტერიტორია და მათი მიმდებარე ქუჩები იგულისხმება. ამ ჩამონათვალში 50–მდე ქუჩაა გაწერილი. ცენტრალურ ზონაშია „ხუთსართულიანი“ დასახლების დასავლეთით მდებარე ტერიტორია, ასევე აბასთუმნის და ახალქალაქის გზატკეცილები , ავტოსადგურის და საბარგო სადგურის მიმდებარე ტერიტორიის ნაწილიც.

შუალედურ ზონაში მოხვდა: მაისურაძის, ჩოლოყაშვილის, ნიკოლაძის, ჯავახიშვილის, ვაჟა–ფშაველას, მღვდელი თევდორეს, ფალიაშვილის, ჭყონდიდელის, ჯაყელის, ბაღინაშვილის, სამსონიძის, ერევნის, ქუთაისის, საფარის, ზარზმელის, გორის, ჯანაშიას და ივანე ახალციხელის ქუჩები.

პერიფერიულ ზონაში გადის : „საბარგო სადგურის“ დასახლება ( გიორგი ბრწყინვალეს, ბორჯომის, აბასთუმნის, ჭონქაძის, ივ. ახალციხელის, ადიგენის, ტაბიძის და ტაბიძის ჩიხი), ასევე, სომხური სასაფლაოს და ყოფილი „ყველ–კარაქის“ქარხნის მიმდებარე ტერიტორია.

[თინათინ ზაზაძე, ახალციხე]