ახალციხის ცენტრალური სადგურის მიმდებარე ტერიტორიის მოსაწყობად 89.968 ლარი დაიხარჯება

სამუშაოებს ტენდერში გამარჯვებული შპს „მშენებელი 2004“ შეასრულებს. შპს–მ სამუშაოები ორი თვის ვადაში უნდა დაასრულოს.

კომპანიამ სამუშაოები უკვე დაიწყო, 8–სართულიან კორპუსთან 10 ჭადრის ხე გადაბელეს, 3 კი მოჭრეს. თამარაშვილის N2–ში მცხოვრები მოსახლეობა აცხადებს, რომ ხეების მოჭრის საწინააღმდეგო არაფერი აქვთ, თუმცა კარგი იქნებოდა მათი გადაბელვა გაზაფხულზე მომხდარიყო.

„აგრონომი ვარ და ვიცი ახლა გადაბელვა არ შეიძლება, ეს ადრე გაზაფხულზე ან შემოდგომით უნდა მოხდეს, თუმცა ახლა არაფერი შეიცვლება. ჩემი რჩევა გაითვალისწინეს და ხეებს საღებავი წაუსვევს, ასე საფრთხე აღარ დაემუქრება. მოსახლეობა წინააღმდეგი არ არის, სინათლე შევიდა ოთახებში“, – ამბობს თამარაშვილის ქუჩაზე მცხოვრები როლანდ ხმალაძე.

შპს „მშენებელი 2004“ პროექტის ფარგლებში თამარაშვილის N2–ში მდებარე 8– სართულიანი კორპუსის წინ სკვერს მოაწყობს. სკვერში დაიდგმება ხის ფაჩანტური, ბაღის დეკორატიული სკამები და ნაგვის ურნები. 155 კვ.მ–ზე დაითესება გაზონი.

აღნიშნული კომპანია, სადგურის ტერიტორიაზე, მეორე მსოფლიო ომში დაღუპულთა მემორიალთან დააგებს ასფალტს და მოაწყობს მგზავრთა მოსაცდელს.



[თინათინ ზაზაძე, ახალციხე]